Гулшат Жўлдошева ва Султанбай Айжигитов. aki.kg сайти фотосурати
Жогорку Кенеш (Қирғизистон парламенти) собиқ депутати Султанбай Айжигитов ва унинг рафиқаси Гулшат Жўлдошева 2025 йил 2 июлгача уй қамоғида бўлади. Бундай қарор Бишкекнинг Первомайский туман суди томонидан қабул қилинди, деб ёзади 24.kg.
Kaktus.Media хабарига кўра, Айжигитовнинг суд залида тоби қочган, ранги оқариб кетган ва инсульт гумони билан касалхонага ётқизилган.
Мансаб ваколатини суиистеъмол қилганликда айбланаётган Айжигитовга нисбатан шундай эҳтиёт чораси қўлланилган. Миллий хавфсизлик давлат қўмитаси (МХДҚ) маълумотларига кўра, у 2022 йили парламент депутати бўлган вақтида хотинини ноқонуний равишда Жогорку Кенеш аппаратига ёрдамчи қилиб олган. Терговчиларга кўра, бу турмуш ўртоқларнинг хизматда бевосита бўйсуниш муносабатларида бўлишини тақиқловчи қонунчиликка ва депутатлик одоб-ахлоқ кодексига зиддир. Айтилишича, Жўлдошева 2022 йил февралидан 2025 йил апрелигача иш ҳақи, мукофот ва бошқа тўловлар тарзида бюджетдан 3,2 миллион сомдан (36,6 минг доллар) ортиқ маблағни ноқонуний равишда олган.
Миллий хавфсизлик давлат қўмитаси маълумотларига кўра, худди шундай қонунбузарликлар Айжигитов Боткен вилояти губернатори бўлган даврда – 2005-2008 ва 2010-2011 йиллари содир бўлган: у ўз хотинини «Торт-Гул» меҳмонхонаси директори лавозимида ноқонуний жойлаган.
Айни пайтда ижтимоий тармоқларда Айжигитов ва Жўлдошеванинг тан жароҳати олган суратлари пайдо бўлган. Собиқ депутат тан жароҳатларини МХДҚ ходимлари сўроққа олиб кетиш учун мажбуран машинага судраган пайтида олганини айтган. Айжигитовнинг сўзларига кўра, у ўз рафиқасини ҳимоя қилишга уринганида, Миллий хавфсизлик давлат қўмитаси ходимлари куч ишлатган. Хавфсизлик кучларидаги манбанинг хабар беришича, эр-хотин МХДҚ ходимларига қаршилик кўрсатиши натижасида тан жароҳатлари олган. Ҳуқуқ-тартибот идоралари ҳозирча ҳодисага расман изоҳ бермаган.
ℹ️ Айжигитов муаммолари март ойи бошида Қирғизистон ҳукуматини Тожикистон билан давлат чегарасини делимитация қилиш масаласида танқид қилганидан сўнг бошланган. Депутат келишув Тожикистон томони учун қулай шартлар асосида тузилган, деб ҳисоблайди. Шундан сўнг «Ыйман нуру» фракцияси уни ўз аъзолигидан чиқариб ташлаган ва Миллий хавфсизлик давлат қўмитаси раиси Қамчибек Ташиев Айжигитовга нисбатан компромат тўплаганини маълум қилган. Март ойи охирида Қирғизистон Марказий сайлов комиссияси Айжигитовни депутатликка номзод сифатида рўйхатдан ўтишда судланганлигини кўрсатмагани учун депутатлик мандатидан маҳрум қилган. Айжигитовнинг ўзи эса сайловдан олдин у Ички ишлар вазирлигидан судланганлиги йўқлиги ҳақида маълумотнома олганини айтади.
