Тожикистон президенти матбуот хизмати фотосурати
Тожикистон президенти Эмомали Раҳмон Иккинчи жаҳон уруши қатнашчилари ва мамлакат халқини Ғалабанинг 80 йиллиги билан табриклар экан, ушбу фожиали воқеа ва 1990-йиллардаги фуқаролар урушини таққослади. Бундан ташқари, давлат раҳбарининг сўзларига кўра, кейингиси республикага кўпроқ йўқотиш ва зарар келтирган. Тожикистон раҳбари матбуот хизмати президент сўзларидан иқтибос келтиради.
Раҳмон Иккинчи жаҳон уруши миқёси ва инсоният фожиаси жиҳатидан замонавий тарихдаги энг даҳшатли уруш бўлганини таъкидлади. 70 дан ортиқ давлат можарога тортилган ва 55 миллиондан ортиқ одам ҳалок бўлган. Мутахассислар молиявий зарарни бугунги долларда 4,5 триллион долларга баҳоламоқда.
Президент таъкидлашича, Тожикистон халқи фашистлар зулми устидан қозонилган ғалабага мардонавор ва муносиб ҳисса қўшган.
«Гарчи қонли жанглар Тожикистондан минглаб километр узоқда кечган бўлса-да, унинг акс-садоси бутун мамлакатимиз бўйлаб янгради ва ҳар бир тожик оиласи унинг фожиаларидан азият чекди», — деди Раҳмон.
Унинг таъкидлашича, ўша пайтда республиканинг бир ярим миллион аҳолисидан 300 мингдан ортиғи ёки меҳнатга лаёқатли аҳолининг 50 фоизи фронтга сафарбар этилган. 100 мингдан ортиқ тожикистонлик жангларда ҳалок бўлган, 40 мингдан ортиғи бедарак йўқолган, яна 60 минг нафари ногирон бўлиб қайтган. Бундан ташқари, 45 мингдан ортиқ киши СССРнинг бошқа минтақаларидаги саноат корхоналарига юборилган, кейин уларнинг кўплари фронтда бўлишган. Ўз ватанида армияга ёрдам кўрсатган, ўша мудҳиш йиллари Тожикистонга эвакуация қилинган кўплаб одамларга, асосан, аёллар ва болаларга бошпана берганларни унутмаслик керак.
«Урушдан қайтмаганлар эзгу хотирасини абадий сақлаймиз, Ватанга ғалаба билан қайтганларни ҳамиша эъзозлаймиз», — деди президент.
Шу билан бирга, у мамлакат тарихида 1990-йилларга бориб тақаладиган яна бир қоронғу саҳифа бўлганини, яъни республика фуқаролар уруши гирдобига тушиб қолганини эслатди. Раҳмоннинг сўзларига кўра, фуқаролар уруши қурбонлари сони ва моддий зарар миқдори Тожикистоннинг Иккинчи жаҳон урушидаги йўқотишларидан кўп бўлган: 150 минг киши ҳалок бўлган, миллиондан ортиқ қочқин, иқтисод эса 10 миллион доллардан кўпроқ зарар кўрган.
«Уруш ва хунрезликларга барҳам бериш, конституциявий ҳокимиятни тиклаш, мамлакатда тинчлик ва осойишталикни таъминлашда, шубҳасиз, Тожикистон халқи, Қуролли Кучларимиз ҳарбий хизматчилари, ҳуқуқни муҳофаза қилувчи органлар ходимлари катта ва ҳал қилувчи рол ўйнади», — дея якунлади давлат раҳбари.
Раҳмон замонавий дунёга таъсир этаётган салбий ва таҳликали жараёнлар фонида мустаҳкам тинчлик, сиёсий барқарорликни сақлаш, миллий бирлик ва тожик давлатчилиги асосларини мустаҳкамлаш ҳар бир мамлакат фуқаросининг муқаддас бурчи эканини таъкидлади.
Президент эслатганидек, айнан Тожикистон БМТ Бош Ассамблеясининг 79-сессиясида «Келажак авлодлар учун тинчликни мустаҳкамлаш ўн йиллиги» деб эълон қилинган резолюцияни қабул қилишни таклиф қилган эди.
«Тожикистон даҳшатли урушдан омон қолган давлат сифатида ҳамиша барча келишмовчилик ва можароларни фақат музокаралар, тинч йўл билан ҳал этиш тарафдоридир. <…> Тинчликсевар тожик халқи мамлакатимиз мустақиллиги ва эркинлиги, суверенитети ва тўлиқ барқарорлиги ҳаққи бундан буён ҳам келажак авлодлар учун ушбу улуғ неъматларни сақлаб қолиш учун бор куч-қудратини сарфлашига ишонаман», — деди Раҳмон.
