"Ўзатом" матбуот хизмати фотосурати
«Ўзатом» агентлиги Венгриянинг MVM EGI Zrt. давлат корхонаси билан ҳамкорлик шартномасини имзолади. Хусусан, ҳужжат Ўзбекистоннинг бўлажак атом электр станцияларида қуруқ совутиш тизимларини жорий этишни назарда тутади, дейилади агентлик матбуот хизмати хабарида.
Таъкидланишича, келишув Венгрия Бош вазири Виктор Орбан ва Будапештда расмий ташриф билан бўлиб турган Ўзбекистон Президенти Шавкат Мирзиёев иштирокида тузилган. Олий даражадаги музокаралар якунлари бўйича томонлар ҳамкорликка оид қатор ҳужжатларни, жумладан, атом энергиясидан тинч мақсадларда фойдаланиш соҳасида ҳам бир қатор ҳужжатларни имзоладилар.
«Ўзатом» ва MVM EGI Zrt. илмий тадқиқотлар олиб бориш, инновацион технологияларни ишлаб чиқиш ва жорий этиш, атом электр станцияларида қуруқ совутиш тизимларини етказиб бериш ва ўрнатиш, шунингдек, технологик жараёнларни маҳаллийлаштириш ва зарур инфратузилмани яратишни назарда тутади. Ўзбекистон агентлиги ва Венгрия корпорацияси вакиллари кадрлар тайёрлаш соҳасида ҳамкорликда фаолият олиб боришга келишиб олдилар. Шундай қилиб, мутахассисларни тайёрлаш ва малакасини ошириш дастури ишлаб чиқилади.
Бундан ташқари, узоқ муддатли ва ўзаро манфаатли ҳамкорлик асосларини яратишга қаратилган ўзаро англашув меморандуми имзоланди. Ҳужжатда Ўзбекистонда атом электр станцияларини қуриш лойиҳаларини амалга оширишда томонларнинг ўзаро ҳамкорлиги механизмлари белгилаб берилган.
ℹ️ MVM EGI Zrt. компанияси 1948 йилда ташкил этилган ва энергетика соҳасида ҳам ички, ҳам халқаро миқёсда етакчи ҳисобланади. Компания бутун дунё бўйлаб минглаб электр станциялари учун ишончли асосни ташкил этувчи сувни тежовчи совутиш тизимларини ишлаб чиқиш ва жорий этишга ихтисослашган.
ℹ️ Айни пайтда Россиянинг «Росатом» корпорацияси Ўзбекистонда кам қувватли атом электр станциясини (КҚАЭС) қуриш лойиҳасини амалга оширмоқда.
Биринчи КҚАЭС Жиззах вилоятининг Фориш туманидаги Тузкон кўли яқинида қурилиши режалаштирилган. Бу ерда ҳар бири 55 МВт қувватга эга олтита реактор ўрнатилади, уларнинг умумий қуввати 330 МВт ни ташкил этади. Реакторлар атом энергетикаси соҳасидаги хавфсизлик талаблари ва стандартларини ҳисобга олган ҳолда бир майдонда жойлаштирилади. Биринчи реактор 2029 йили ишга туширилиши кутилмоқда.
