Чехия президенти Пётр Павел Афғонистондаги ҳарбий миссияси чоғида асирга олинган афғон аскарининг ўлимига алоқадорликда айбланган махсус кучларнинг тўрт нафар аскарини афв этди. Бу ҳақда Reuters хабар берди.
Авф этиш тўғрисидаги қарор ишнинг барча ҳолатларини синчиклаб кўриб чиқиб, жанговар вазиятнинг истисно шартларини ва асосий айбловлар зўравонлик жиноятларига тааллуқли эмаслигини инобатга олган ҳолда қабул қилинган.
Президент девонининг таъкидлашича, афв этиш тўғрисида қарор қабул қилишда қарийб етти йил давом этган тергов давомийлиги ва ишнинг мураккаб халқаро контексти ҳам ҳисобга олинган. Афвни ҳарбийлар ва жамоат ташкилотлари вакиллари қўллаб-қувватлаб, аскарлар ўта оғир стресс ва жанговар шароитда ҳаракат қилгани таъкидланади.
Ҳодиса 2018 йил октябрь ойида Ҳирот вилоятидаги Шинданд авиабазасида содир бўлган. 19 ёшли афғон махсус кучлари аскари Воҳидуллоҳ Хон чехлар конвойига қарата ўт очган, натижада бир ҳарбий итни ўлдирган, яна иккитасини яралаган. Афғон кучлари Хонни қўлга олиб, НАТО коалицияси вакилларига топширган. Чехия элита қисмининг 601-махсус кучлари гуруҳи жангчилари томонидан сўроқ қилинаётганда Хон шафқатсиз муомала ва қийноқларга дучор бўлган, бу ҳақда унинг оғриқли фарёдларини эшитган афғон таржимони кўрсатма берган. Сўроқ тахминан 20 дақиқа давом этган, шундан сўнг Хон афғон расмийларига топширилган ва у кўп ўтмай касалхонада вафот этган.
Дастлаб Чехия Мудофаа вазирлиги Хон ўлимига чех ҳарбий хизматчиларининг алоқадорлиги ҳақидаги айбловларни рад этган. Шундан сўнг Чехия полицияси тергов бошлайди, бироқ у уч йилдан кўпроқ вақт ўтиб, 2021 йил декабрида ёпилади. Иш 2024 йилда қайта очилади, натижада тўрт нафар ҳарбий хизматчига нисбатан айблов қўйилади. Чехия махсус кучларининг икки аскарига товламачилик ва буйруққа бўйсунмаслик, яна икки нафарига қўриқлаш вазифасини бузганлик ва ёрдам кўрсатмаганлик айби қўйилган.
Афв ҳақидаги қарор Брно суди иш бўйича айрим айбланувчиларга умрбод қамоқ жазоси берилиши мумкинлиги ҳақида огоҳлантирганидан бир ой ўтиб қабул қилинди.
