liter.kz сайти фотосурати
Венгриянинг учта фармацевтика компанияси Ўзбекистон ҳукумати билан республикада дори воситалари ишлаб чиқаришни йўлга қўйиш имкониятларини муҳокама қилмоқда. Бу ҳақда «Ўзбекистон 24» телеканалига таяниб, «Газета.uz» хабар берди.
Нашрнинг ёзишича, телевидениега берган интервьюсида Ўзбекистон Фармацевтика тармоғини ривожлантириш агентлиги директори Абдулла Азизов бўлажак битимларнинг айрим тафсилотларини маълум қилган. Шундай қилиб, Венгриянинг етакчи ишлаб чиқарувчилардан бири, йиллик ҳажми 2 миллиард долларни ташкил этувчи Gedeon Richter Марказий Осиё давлати билан ҳамкорлик қилмоқда. Европаликлар 36 миллион долларлик дори-дармонларни экспорт қилади. Аммо ҳозирда контракт ишлаб чиқаришни йўлга қўйиш бўйича музокаралар олиб борилмоқда.
Азизов таъкидлашича, биринчи босқичда бешта дори воситасини ишлаб чиқаришни йўлга қўйиш режалаштирилган, келажакда клиник протоколлар қайта кўриб чиқилади, бунинг натижасида номенклатура ўзгаради ва Венгрия корхонаси дори воситалари ишлаб чиқаришни кенгайтириш имкониятига эга бўлади.
Ўзбекистонда ишлаб чиқаришни йўлга қўйиш истагини билдирган яна бир компания – Egis Pharmaceuticals. Бугунги кунда венгерлар республикага умумий қиймати 6-7 миллион долларлик 30 дан ортиқ турдаги дори воситалари етказиб бермоқда. Лекин бу ерда заводнинг ташкил этилиши ишбилармонлар учун янги истиқболларни очиб, маҳаллий бозордаги иштирокини ошириши шубҳасиз.
Бундан ташқари, Фармацевтика саноатини ривожлантириш агентлиги Meditop Pharmaceutical компанияси билан музокаралар олиб бормоқда. Азизовнинг сўзларига кўра, ушбу компания 16 та дори воситасини Ўзбекистонда рўйхатдан ўтказган ва ишлаб чиқаришни маҳаллийлаштиришни ҳам режалаштирган. Шу билан бирга, европаликлар маҳсулотларга бўлган талабни аниқлаш учун маркетинг тадқиқотларини ўтказмоқда. Натижа ижобий бўлса, компания Tashkent Pharma Park кластерида дори воситалари ишлаб чиқаришни бошлайди.
ℹ️ Эслатиб ўтамиз, Ўзбекистон Президенти Шавкат Мирзиёевнинг Венгрияга 20-21 май кунлари бўлиб ўтган расмий ташрифи доирасида икки давлатнинг алоҳида идоралари вакиллари ўз ҳудудларида алоқаларни йўлга қўйиш мақсадида учрашувлар ўтказган эди. Хусусан, иқтисодий ва сармоявий алоқаларни ривожлантиришга катта эътибор қаратилди.
Шундай қилиб, «Ўзатом» агентлиги Венгриянинг MVM EGI Zrt давлат корхонаси билан ҳамкорлик шартномасини имзолади. Ҳужжатда бўлажак Ўзбекистон атом электр станцияларида қуруқ совутиш тизимларини жорий этилиши кўзда тутилган.
