abc-rail.com сайти фотосурати
Ўзбекистон мулозимлари темир йўл юк станцияларини Тошкентдан ташқарига кўчириш таклифини илгари сурди, чунки айни дамда мазкур объектларда поездлар қатновида навбатлар ва кечикишлар кузатилмоқда. Бу масала 27 май куни Республика Президенти Шавкат Мирзиёевга тақдим этилган темир йўл соҳасини ривожлантириш чора-тадбирлари тақдимотида муҳокама қилинди, деб хабар беради давлат раҳбари матбуот хизмати.
Лойиҳанинг долзарблиги айни пайтда ташқи юкларнинг 70 фоизи Тошкентнинг «Чуқурсой» бекати орқали ўтаётгани билан изоҳланади. Кўпинча бу ерда кўп кунлик навбатлар ҳосил бўлади, бу эса ташувчилар учун қўшимча харажатларга сабаб бўлмоқда.
Мутахассисларнинг фикрича, юк станцияларини шаҳар ташқарисига кўчириш, шунингдек, Янгийўл тумани ва Янги Тошкент яқинида йирик станциялар қуриш орқали муаммони ҳал қилиш мумкин. Шунингдек, пойтахтни айланиб ўтувчи «Озодлик – Янгиер» темир йўли қурилиши кўзда тутилган. Натижада Фарғона водийси билан бошқа вилоятлар ўртасидаги юк ташувлари Тошкент шаҳрига кирмасдан амалга оширилади.
Тегишли идоралар вакиллари давлат раҳбарига «Самарқанд-Ургут» темир йўли қурилиши бўйича ҳам ҳисобот берди, бу ерда 7 километр рельс ётқизилган. Бу йўналиш узунлиги жами 54 километр бўлиб, 2 та вокзал, «Ургут» иқтисодий зонасида 2 та юк станцияси қурилади.
Мутасаддилар президентнинг 2023 йил 10 октабрдаги фармони асосида амалга оширилган ислоҳотлар ҳақида мутасаддилар ҳисобот берди. Хусусан, «Ўзбекистон темир йўллари» акциядорлик жамиятида таркибий ўзгаришлар амалга оширилди: асосий бўлмаган активлар қисқартирилди, кераксиз функциялар олиб ташланди.
Натижада авваллари зарар билан ишлаган ташкилот ўтган йилни 47 миллиард сўм (3,6 миллион доллар) фойда билан якунлади. Temiryoʻlkargoнинг ташкил этилиши юк вагонларидан фойдаланиш самарадорлигини икки баравар оширишга олиб келди. Экспертларнинг фикрича, ҳали имкониятлар кўп, чунки, масалан, транзит юкларни ташиш имкониятлари тўлиқ амалга оширилмаган. Буни келгуси йилларда 40 фоизга ошириш орқали даромадни 2 карра кўпайтириш мумкин.
Тақдимотда Хитой – Туркия йўналишида илк бор юк поездлари қатнови йўлга қўйилгани, Ўзбекистонга янги поездлар олиб келинаётгани, қатновлар сони йилдан-йилга ортиб бораётгани таъкидланди. Шу боис тегишли бошқармалар томонидан темир йўл инфратузилмасининг ўтказиш қобилиятини ошириш бўйича изчил ишлар амалга оширилмоқда.
