kabar.kg сайти фотосурати
Қирғизистоннинг Жалолобод вилоятида жойлашган Тўқтўғул сув омборидаги сув ҳажмига оид маълумотлар энди «Электр станциялари» ОАЖ сайтида жамоатчилик учун эълон қилинмайди. Бу ҳақда Economist.kg нашри маълум қилди.
Бундан ташқари, ОАВ ёзишича, тегишли статистик маълумотлар 15 майдан бошлаб янгиланишни тўхтатди. «Электр станциялари» журналистларга шу ойдан бошлаб сув омборидаги ресурслар ҳажми ҳақидаги маълумотлар ошкор этилмаслигини тасдиқлади, чунки маълумотлар «фақат расмий фойдаланиш учун» тоифасига киритилган.
Компания ҳукуматнинг бу қарори Тўқтўғул сув омбори стратегик аҳамиятга эга объект сифатида таснифланиши билан боғлиқ, деб тушунтирди. Эндиликда бу ерда жойлашган ГЭСларнинг сув ҳажмига оид статистик маълумотларни фақат ваколатли органлар, жумладан, Миллий хавфсизлик давлат қўмитаси (МХДҚ) га расмий сўров берган ҳолда олиш мумкин.
Бундан ташқари, сув ресурслари, қишлоқ хўжалиги ва қайта ишлаш саноатига оид маълумотлардан фойдаланиш бўйича барча сўровлар ҳам Ташқи ишлар вазирлиги ва Қишлоқ хўжалиги вазирлиги ҳузуридаги Сув хўжалиги хизмати томонидан албатта тасдиқланиши керак.
Охирги марта 15 май куни ОАВда Тўқтўғул сув омборининг сув баланси бўйича статистик маълумотлар пайдо бўлган эди. Ўшанда сув ҳажми 9 миллиард 529 миллион куб метрни ташкил этиши, бу бир йил аввалги ва ўтган ойдаги кўрсаткичлардан сезиларли даражада ошиб кетгани маълум қилинганди. Таққослаш учун, бир йил аввал сув сатҳи 8,245 миллиард «куб»дан ошмаган, бир ой аввал эса 8,569 миллиарддан.
Бундан ташқари, ресурсларнинг кириб келиши ва сарфи ҳақидаги маълумотлар очиқ эълон қилинган. 15 май ҳолатига кўра, бу кўрсаткичлар мос равишда 1230 м3 / с ва 181 м3 / с ни ташкил этган. Агар динамика ҳисобга олинса, ўтган ойда сув оқими секундига 385 кубометр, сарф эса 179 м3 / с даражасида бўлган.
ℹ️ Тўқтўғул сув омбори Норин дарёсидаги Тўқтўғул ГЭСи тўғонидан ҳосил бўлган. Объект қурилиши 10 йилдан ортиқ давом этган ва 1970 йилларда қуриб битказилган. Омборни сув билан тўлдириш 1973 йили бошланган.
