Болот Темиров. Telegramга юкланган видеодан кадр
Хорижда яшаётган қирғизистонлик журналист Болот Темиров ўзининг куни-кеча ҳибсга олинган «Клооп» нашри ходимлари билан алоқадор эканига оид президент Администрацияси матбуот хизмати раҳбари Дайирбек Ўрунбеков берган маълумотини «ёлғон» деб атади. Бу ҳақда Темиров ўзининг Telegram-каналида ёзган.
Темиров эслатишича, Ўринбеков версиясига кўра, гўёки айнан бадарға қилинган журналист «Клооп»нинг собиқ ва амалдаги ходимларининг «сохта текширувлар» ўтказишини молиялаштирган. Ўз жавобида у мулозим сўзларини «ҳибсларни оқлашга уриниш» деб атаган.
Темиров сўзларига кўра, у Миллий хавфсизлик давлат қўмитаси томонидан ҳибсга олинганлар билан ҳамкорлик қилмаган, бу одамларнинг аксариятини танимайди ҳам.
«Мен буйруқ бермайман, ҳеч қандай тармоқни бошқармайман, ҳеч кимга пул тўламайман. Мен барча текширувларимни ўзим ёки бошқа мустақил нашрлар, жумладан, халқаро таҳририятлар билан ҳамкорликда ўтказаман», — дея қўшимча қилади журналист.
Унинг аниқлик киритишича, дастлаб Қирғизистон расмийларининг уни «Клооп» ходимларини билан боғлашга уринаётганига аҳамият бермаган. Аммо энди улар «ушбу ёлғондан қандай қилиб жиноят иши ясаётгани» аниқ бўлган.
Темиров «Клооп»ни ҳурмат қилишини ва ҳақиқатан ҳам ўтмишда нашр билан қўшма текширувлар ўтказганини тан олади. Шу билан бирга, у ҳамкасблари билан «жамоанинг қийин кунларида» бирдам эканини таъкидлайди.
«Уларнинг «гувоҳлик» беришга мажбурлаш учун қандай усуллардан фойдаланишаётганини билмайман. Лекин, ҳозирда содир бўлаётган нарса — қўрқувдир. Ҳақиқатдан қўрқаётганларнинг қўрқуви. <…> Журналистларни қамаш орқали бутун жамият кўзини юмишади. Ва кейин, ўша зулмат ва сукунатда улар сизнинг уйингизни, мулкингизни, келажагингизни тортиб олишлари мумкин — ва буни ҳеч ким билмайди. Журналистларни қамашаётган экан, демак уларга ҳақиқат ҳалақит бермоқда. Агар жим бўлсак, демакким, сукут — аломати ризо. Мен эса рози эмасман. Ва бу менинг жавобим», — дея хулоса қилади Темиров.
ℹ️ 29 май куни Қирғизистон Миллий хавфсизлик давлат қўмитаси ходимларининг «Клооп» нашри оператори Александр Александров ва ушбу ОАВнинг собиқ ходими Жоомарт Дуулатовни ҳибсга олишгани маълум бўлди. Улар оммавий тартибсизликларга чақиришда гумон қилинмоқда.
Юқорида тилга олинган фуқаролардан ташқари яна беш киши, жумладан «Клооп»нинг икки журналисти Айдай Эркебаева, Зиягул Болот қизи, нашрнинг собиқ ходими Зара Садигалиева, шунингдек, ўша пайтда ОАВ вакиллари билан бирга бўлган икки қиз ҳибсга олинган.
Тез орада улар ҳеч қандай айбловсиз қўйиб юборилган. Қизлар гувоҳ сифатида сўроқ қилинган. Аммо айрим ҳолларда МХДҚ ходимлари қўлга олинганларни тинтув қилган, телефон ва бошқа жиҳозларни олиб қўйган. Хавфсизлик кучларининг хатти-ҳаракатлари сабаблари номаълум, чунки озод этилганлар ошкор этмаслик тўғрисида тилхатни имзолашган.
