anhor.uz сайти фотосурати
Тошкент шаҳар суди пойтахтнинг Янгиҳаёт тумани ички ишлар бўлимининг уч нафар ходимига нисбатан ҳибсдагиларга мунтазам қийноқлар қўллагани айблови билан ҳукм чиқарди. Ҳуқуқ-тартибот идоралари ходимларидан бири 11 йилга, қолганлари эса беш йилу бир ойга озодликдан маҳрум этилди, деб ёзади Nova24.uz суд қарорига таяниб.
Тергов материалларига кўра, ИИВ ходимлари видеокузатув ўрнатилмаган хонада фуқароларни сўроқ қилишган ва бу билан қоидани бузган. Бундан ташқари, судланувчилар одамларни ўз айбига иқрор қилдириш учун ноқонуний усулларни қўллашган: калтаклашган, бўғишлашган, электршокер билан қийнашган, руҳий босим ўтказишган.
Жиноят ишига бириктирилган бешта эпизод маълум. Шундай қилиб, жабрланувчилардан бирининг айтишича, у айбини тан олишдан бош тортганида ҳуқуқ-тартибот идоралари ходимлари уни қийноққа солишган. Жабрланувчининг қўлига кишан солиб, бошига пакет кийдиришган, бўйнини скотч билан ўрашган.
«Бўғилиб қолдим. Кейин белимга, оёқларимга зарба беришди, элекршокер билан қийнашди»— дея қўшимча қилган ҳибсдаги шахс.
Тиббий кўрик натижасида жабрланувчида кўплаб тан жароҳатлари, жумладан, зарба излари ва электршокердан фойдаланишга хос куйиш излари аниқланган.
Яна бир жабрланувчининг сўзларига кўра, «зарур қоғозларга» имзо қўйишини талаб қилиб,уни шафқатсизларча калтаклашган. Қийноқлар натижасида эркак бошидан жиддий жароҳатлар олган. Боз устига, таёқ билан урилганидан кейин маҳбуснинг қулоқ пардаси ёрилиб кетган.
Яна бир фуқаронинг айтишича, орган ходимлари унга нисбатан «жинсий камситишларни» қўллашган. Улар маҳбуснинг иштонини ечиб, интим жойига зажигалка тақашган ва агар айбига иқрор бўлмаса, ўша жойини ёндириб ташлаш билан таҳдид қилишган.
Садистларнинг тўртинчи қурбони унинг қорнига ва юзига пашшакалтак билан уришганидан шикоят қилган. Кейин улар соқолининг бир қисмини куйдириб, шерикларига қарши кўрсатма олиш мақсадида уни тириклайин ёқиб юбориш билан қўрқитишган.
Жабрланганлар орасида бир аёл ҳам бўлган. Сўроқ пайтида уни зўрлаш билан қўрқитишган ҳолда қаттиқ калтаклашган.
Натижада суд ҳуқуқни муҳофаза қилувчи орган ходимларини Ўзбекистон Жиноят кодексининг 235-моддаси 2-қисми («Қийноқлар ва бошқа шафқатсиз, ғайриинсоний ёки қадр-қимматни камситувчи муомала ёки жазо қўллаш») билан айбдор деб топган. Иш бўйича икки айбланувчи беш йилга, яна бири эса 11 йилга озодликдан маҳрум этилган. Барча маҳкумлар жазони умумий режимли колонияларда ўташади.
