"Клооп"нинг қўлга олинган ходимлари. kloop.kg сайти фотосурати
Қирғизистон Миллий хавфсизлик давлат қўмитасининг маълум қилишича, Kloop Media (ЖФ) жамоат фондининг тугатилганига қарамай, ушбу тузилма вакиллари ўз фаолиятини давом эттирмоқда. Бундан ташқари, махсус хизматга кўра, уларнинг фаолияти мамлакатда оммавий тартибсизликлар уюштиришга қаратилган. МХДҚ матбуот-релизидан Kaktus.media нашри иқтибос келтиради.
Ҳуқуқ-тартибот идораси «Клооп» сайтини бошқарадиган Kloop Media фонди ўтган йил февраль ойида суд қарори билан тугатилганини, шунинг учун унинг фаолияти республика ҳудудида тақиқланганини эслатади. Аммо нашр ходимлари ҳамон «салбий йўналишдаги, Қирғизистон давлат ва муниципал органларига оид бузиб кўрсатилган маълумотларга эга» материалларни чоп этишмоқда.
МХДҚ маълумотларига кўра, журналистлар фаолияти «оммавий тартибсизликларни янада уюштириш учун жамоатчилик фикрини манипуляция қилиш мақсадида фуқаролар ўртасида норозилик уйғотиш»га қаратилган.
Терговчилар версиясига кўра, мазкур фаолият «Оммавий ахборот воситалари тўғрисида»ги қонуннинг бир қатор моддаларга зиддир. Қолаверса, бунда республика журналистларининг Ахлоқ кодексида умумеътироф этилган меъёрларга амал қилинмаяпти.
Қайд этилишича, қўлга олинган «Клооп» ходимлари оммавий тартибсизликларга чақирувлар бўйича қўзғатилган жиноий ишда айбланувчи ҳисобланади.
МХДҚ матбуот хизматининг қўшимча қилишича, ёш журналистларни бузғунчилик фаолиятига жалб қилиш Kloop Mediaнинг хориждаги собиқ раҳбарларининг кўрсатмаси асосида ташкил этилмоқда. Буюртма қилинган материалларнинг ҳомийлари эса хорижий ташкилотлардир. Бундан ташқари, гумонланувчилар материалларни YouTubeдаги Temirov Live канали асосчиси Болот Темиров билан биргаликда нашр қилган.
Қўмита, шунингдек, молиялаштириш тартиби «Нотижорат ташкилотлари тўғрисида»ги қонунни бузган ҳолда амалга оширилганига ишонч билдиради.
«Ушбу фаолиятнинг бошқа иштирокчиларига олиб борилган ишларнинг ноқонунийлиги сабаблари тушунтирилди, шундан сўнг улар қонун талабларини бузганликларини тан олдилар ва собиқ Kloop Media» ЖФ билан келгусида ҳамкорлик қилишдан бош тортишга ваъда беришди», — дейилади МХДҚ хабарида.
ℹ️ Эслатиб ўтамиз, 28 май куни Қирғизистон махсус хизматлари «Клооп» оператори Александр Александров ва ушбу ОАВнинг собиқ ходими Жоомарт Дуулатовни қўлга олган эди.
30 май куни суд мажлиси бўлиб ўтди, унда иккала айбланувчи икки ойга ҳибсга олинди.
Қўшимча қиламизки, юқорида қайд этилган фуқаролардан ташқари яна бир неча киши ҳибсга олинган, уларнинг кўпчилиги «Клооп»нинг собиқ ёки амалдаги ходимларидир. Тез орада улар ҳеч қандай айбловларсиз, лекин ошкор қилмаслик тўғрисидаги тилхат билан озод қилинган.
Журналистларни ҳибсга олиш бошланганидан сўнг Қирғизистон президенти Администрацияси матбуот хизмати раҳбари Дайирбек Ўрунбеков ҳибсга олинган ОАВ вакиллари фаолиятини Болот Темиров молиялаштирганини маълум қилди.
Темировнинг ўзи эса мулозимга зудлик билан жавоб қайтариб, унинг сўзларини «ёлғон» ва «ҳибсларни оқлашга уриниш» деб атади.
