aa.com.tr сайти фотосурати
3 июнга ўтар кечаси Ўрта ер денгизининг Туркия қирғоқлари яқинида 5,8 магнитудали зилзила содир бўлди. Оқибатда ер силкинишидан қаттиқ ваҳимага тушган 14 ёшли қиз вафот этган, камида 69 киши жароҳат олган, деб хабар беради Anadolu агентлиги.
Журналистларга кўра, Туркия ҳукумати қошидаги Фавқулодда вазиятларни бошқариш ва олдини олиш бошқармаси маҳаллий вақт билан соат 02:17 да ер силкинишларини қайд этган. Зилзила эпицентри Муғла вилоятидаги Мармарис курорт ҳудудидан 10 километр узоқликда, эпицентри эса тахминан 68 километр чуқурликда бўлган.
Бошқарма, зилзила Мармарис, Муғла, Айдин, Денизли, Маниса ва Измир шаҳарларида сезилганини таъкидлайди.
Муғла вилояти губернатори Идрис Акбийикнинг маълум қилишича, Фетҳие туманида яшовчи 14 ёшли ўсмир қиз табиий офат қурбони бўлган. Қиз қаттиқ ваҳимага тушган, уни зудлик билан шифохонага етказишган, бироқ шифокорларнинг уринишларига қарамай, ўсмир қиз вафот этган.
Шунингдек, зилзила оқибатида 69 киши жабрланган. Улардан 55 нафари тиббий ёрдам сўраб мурожаат қилган: ўн нафари тез ёрдам машинасида олиб кетилган, қолганлари ўзлари поликлиникаларга етиб борган. Яна 14 нафар фуқаро касалхонага ётқизишдан бош тортган ва уларга воқеа жойида биринчи тиббий ёрдам кўрсатилган.
Туркия матбуотига кўра, силкинишлар пайтида баъзи одамлар ваҳима ичида деразадан сакрашган, натижада улар турли даражадаги тан жароҳатлари олган.
Шу билан бирга, Акбийик, Мармарисда электр таъминоти, табиий газ таъминоти, сув таъминоти ёки канализация тизимларида жиддий узилишлар қайд этилмаганини қўшимча қилган. Шунингдек, у турар-жой биноларида вайронагарчилик кузатилмаганини таъкидлайди. Бироқ, қутқарувчилар ўлкада «дала ишларини» давом эттиришмоқда.
