yuz.uz сайти фотосурати
Ўзбекистон ҳукумати ҳузуридаги Миграция агентлиги Москвада ўтказилган рейд чоғида Россия Миллий гвардияси жангарилари хорижликларга нисбатан жисмоний куч ишлатганидан хавотир билдирди. Жабрланган ватандошларга агентликнинг РФдаги ваколатхонасига мурожаат қилиш тавсия этилади, дейилади агентликнинг Telegram-каналида.
Ўзбекистон расмийларининг интернетда эълон қилинган маълумотларга таянган ҳолда хабар беришича, ҳодиса 8 июнь куни Сокольники туманида содир бўлган. У ерда меҳнат мигрантларининг ҳуқуқий ҳолатини текшириш мақсадида рейд ўтказилган. Шу билан бирга, оммавий ахборот воситалари ва ижтимоий тармоқларда Россия Миллий гвардияси зобитлари томонидан жисмоний куч қўлланилгани акс этган кадрлар ва хабарлар қизғин муҳокама қилинди.
Натижада миграция режимини бузган 5-6 нафар шахс қўлга олинган. Улар орасида Тожикистоннинг икки фуқароси бўлган, кейинчалик улар Россия Федерациясидан депортация қилинган.
«Россия Федерацияси Ҳукумати вакиллари ва йирик иш берувчилар томонидан Ўзбекистон фуқароларини ушбу мамлакатга тартибли ва ташкиллаштирилган тарзда ишга жалб қилишга йилдан — йилга кескин қизиқиш ортиб бораётган бир шароитда, айрим ҳуқуқни муҳофаза қилувчи органлар томонидан чет эл фуқароларига нисбатан бундай қўпол муносабатни кузатилиши афсус ва таассуф уйғотади», — дейилади Миграция агентлиги хабарида.
Мутасаддилар рейд пайтида тан жароҳати олган, ҳуқуқлари поймол қилинган ёки шу каби муаммоларга дуч келган Ўзбекистон фуқароларига мурожаат қилади. Улардан зудлик билан Миграция агентлигининг Россия Федерациясидаги ваколатхонасига +7 925 045-47-44 телефон ёки Telegram: @pomoshrussiamigrant и @huquqiy_yordam_uzbot орқали мурожаат қилишлари сўралади.
ОАВ хабарига кўра, 8 июнь куни хавфсизлик кучлари Москвадаги мигрантлар ётоқхонасида рейд ўтказган. Гувоҳларнинг сўзларига кўра, мусофирларга қўпол муносабатда бўлишган: уларни хоналаридан ҳайдаб чиқаришган, секин ҳаракат қилган чет элликларни ҳақоратлаб, тепишган ва шапалоқлар билан тез юришга мажбурлашган.
