Александр Новак – чапдан иккинчи, Ўзбекистон Бош вазири ўринбосари Жамшид Ходжаев - чапдан биринчи. РФ ҳукумати матюуот хизмати фотосурати
Россия Ўзбекистон билан Марказий Осиё республикасида қуввати 2 ГВт бўлган катта ва 110 МВт қувватга эга кичик атом электр станциясини (АЭС) қуришнинг иқтисодий параметрларини муҳокама қилмоқда. Бу ҳақда 19 июнь куни Петербург халқаро иқтисодий форуми (ПХИФ-2025) доирасида Россия Бош вазири ўринбосари Александр Новак маълум қилди, дея хабар беради «Интерфакс».
«Бугун биз [Ўзбекистондаги АЭС]нинг аниқ иқтисодий параметрларини муҳокама қиляпмиз. 1000 МВтдан иккита блог ва 55 МВтдан иккита блог қурилади», — деди Новак «Жаҳон ёқилғи-энергетика бозори ишлаб чиқарувчилар ва истеъмолчилар манфаатлари ўртасидаги мувозанатни излашда» панел сессиясида.
Ўзбекистонда атом электр станциясини қуриш лойиҳаси қайта форматлангани ва республикада ҳар бири иккитадан энергоблок билан жиҳозланган катта ва кичик станция қурилиши муҳокама қилинаётгани 9-12 июнь кунлари бўлиб ўтган Тошкент халқаро инвестиция форумида маълум бўлди.
Апрель ойи охирида «Росатом» раҳбари Алексей Лихачев Ўзбекистонда катта атом электр станциясини қуриш имкониятлари ҳақидаги саволга жавоб бераркан, мамлакат раҳбарияти уни қуриш тўғрисида қарор қабул қилгунга қадар, у раҳбарлик қилаётган корпорация «нафақат келажакдаги объектларни барпо этиш, балки молиявий схема ва маҳаллийлаштириш билан боғлиқ максимал ташкилий масалалар бўйича ҳам таклифларни тайёр қилишини» айтди.
ℹ️ Ўзбекистон ва Россия ўртасида атом энергетикаси, жумладан, Ўзбекистондаги биринчи АЭС қурилиши бўйича ҳамкорлик тўғрисидаги битим 2017 йил декабрида имзоланган. Умумий қиймати 11 миллиард доллар бўлган биринчи энергетика блоки 2028 йили ишга туширилиши режалаштирилган эди. Ўшанда АЭС мажмуаси ҳар бири қуввати 1200 МВт бўлган иккита энергоблокдан иборат бўлиши тахмин қилинганди.
2024 йил 27 май куни Тошкентда Россия президенти Владимир Путиннинг давлат ташрифи доирасида «Росатом» билан кичик атом электр станциясини лойиҳалаш, етказиб бериш ва қуриш бўйича янги шартнома имзоланган эди. Кичик атом электр станциясини Жиззах вилоятининг Фориш туманидаги Тузкон кўли яқинида қуриш режалаштирилган. Шу йилнинг март ойида кичик АЭС қурилишида биринчи бетонни қуйиш ишлари 2026 йил иккинчи чорагига мўлжаллангани маълум қилинди.
Бундан олдин Лихачев кичик АЭС қурилишини Ўзбекистон томони молиялашини таъкидлаган эди, Россиянинг кредит бериши масаласи муҳокама қилинмаган.
