sputnik.kg сайти фотосурати
Саудия тараққиёт фонди маблағлари ҳисобидан Бишкекда 14 та мактаб қурилади. Шундай қилиб, хорижий ҳамкорлар Қирғизистон пойтахти мэриясига умумий таълим муассасаларига бўлган эҳтиёжни қондиришда ёрдам беради. Бу ҳақда республика Таълим вазири ўринбосари Нодира Жусупбекова мамлакат парламенти депутатларига маълум қилди, деб ёзади 24.kg.
Бироқ, расмий лойиҳанинг нархи ва уни амалга ошириш муддатларига аниқлик киритмаган.
Унинг сўзларига кўра, Қирғизистонда 1,5 миллиондан ортиқ ўқувчи таҳсил олади. Шу билан бирга, мактабларда ўрин этишмовчилиги 163 мингтани ташкил этади. Вазирлик вакили мамлакатда 2153 та умумтаълим муассасаси мавжудлигини таъкидлаган статистик маълумотларни келтирган. Аммо бу етарли эмас, чунки ҳар хил қувватдаги яна 223 та мактаб қуриш зарур.
Жусупбекова ушбу соҳада асосан қурилиш лоббиси туфайли юзага келган қатор муаммолар мавжудлигини маълум қилди. Масалан, Боткен шаҳрида 65 та муассасада 8 минг 737 ўқувчи ўрни етишмайди, бироқ айни вақтда шу вилоятдаги 174 та мактабда 46 мингдан ортиқ бўш ўринлар мавжуд. Гап лоббичилик натижасида, реал эҳтиёжлар ҳисобга олинмаган ҳолда қурилган муассасалар ҳақида бормоқда, дейди вазир ўринбосари.
Унинг қўшимча қилишича, худди шундай ҳолат республиканинг бошқа ҳудудларида ҳам мавжуд. Шунинг учун унинг идораси Қурилиш вазирлиги ва Молия вазирлигидан биринчи навбатда аварияли бинолар жойида 59 та мактаб қурилишини якунлашни сўраган. Бундан ташқари, Таълим вазирлиги томонидан янги таълим муассасалари ва қўшимча биноларга эҳтиёж бор аҳоли пунктлари кўрсатилган рўйхат тузилган.
Kaktus.media ёзгишича, Жусупбекова ва Жогорку Кенеш (парламент) вакиллари ўртасидаги учрашувда мактаблардаги ўринлар етишмаслиги муаммоси қизғин муҳокама қилинган. Хусусан, депутат Ойгул Айдарова фарзандини давлат онлайн тизими орқали иккинчи синфга кирита олмаганидан шикоят қилди. Халқ вакилининг сўзларига кўра, дастур унга бошқа жой йўқлиги ҳақида маълумот берган.
«Менга ўхшаган қанча ота-она борлигини бир тасаввур қилинг! Улар ҳар куни биз билан боғланишади. Тўрт йилдан бери дарслик муаммосини ҳал қила олмадингиз, энди мана бу рекорд. Буни қандай ҳал қилмоқчисиз?» — дея сўраган Айдарова вазир ўринбосаридан.
Вазир ўринбосари бундай ҳолатлар кўпинча ички миграция, аҳоли зич жойлашган шаҳар ва туманларга кўчиб ўтганлиги сабабли юзага келаётганига аниқлик киритган. Ва бу ерда мантиқий ечим янги мактаблар қуришдир.
Шу билан бирга, Жусупбекова суҳбатдошини умумий таълим муассасасида биронта ҳам бола жойсиз қолмаслигига ишонтирган.
«Таълим тизими бунга йўл қўймайди. Ҳар йили сентябргача барча болалар мактабга бириктирилади», — дея хулоса қилади расмий.
