Жамшид Ходжаев ва Саинбуянгин Амарсайхан. Ўзбекистон Савдо-саноат палатаси матбуот хизмати фотосурати
Ўзбекистон президенти Шавкат Мирзиёевнинг Мўғулистонга давлат ташрифи арафасида Улан-Баторда Ўзбекистон-Мўғулистон бизнес-форуми бўлиб ўтди. Бу ҳақда Ўзбекистон Савдо-саноат палатаси хабар берди.
Тадбирда икки мамлакатнинг вазирлик ва идоралари, ҳудудлар, тармоқ уюшмалари раҳбарлари ҳамда 300 дан ортиқ компания вакиллари иштирок этди. Форумда Ўзбекистон делегациясига Ўзбекистон Республикаси Бош вазирининг ўринбосари Жамшид Ходжаев, Мўғулистон томонига эса Мўғулистон Бош вазирининг ўринбосари Сайнбуянгин Амарсайхан раҳбарлик қилди.
Форум давомида Ўзбекистоннинг иқтисодий ютуқлари қайд этилди: мамлакат ялпи ички маҳсулоти 2024 йили 6,5 фоиз ўсиш билан илк бор 100 миллиард доллардан ошди, тўғридан-тўғри хорижий инвестициялар ҳажми 70 миллиард доллардан ошди. Ўзбекистон Савдо-саноат палатаси раиси Даврон Ваҳобов ҳукумат хорижий инвесторларни қўллаб-қувватлаш ва қўшма лойиҳаларни амалга ошириш учун шароит яратишга тайёрлигини тасдиқлади.
Форумда мева-сабзавот, ўғит, қурилиш материаллари, фармацевтика, маиший техника, тўқимачилик, пойабзал, гўшт, чарм-жун маҳсулотлари экспорти каби ҳамкорликнинг устувор йўналишлари белгилаб олинди. Қишлоқ хўжалиги соҳаси вакиллари иссиқхоналар, томчилатиб суғориш ва экинларни қайта ишлаш бўйича лойиҳаларни илгари сурди.
Форум сўнгида жун, газлама, тўқимачилик ва чарм маҳсулотлари ишлаб чиқариш бўйича қўшма лойиҳалар бўйича ҳужжатлар алмашиш маросими бўлиб ўтди. Made in Uzbekistan кўргазмаси маҳсулот тақдимоти ҳамда В2В ва G2B учрашувлари билан ўтказилди.
Эртаси куни, 24 июнь куни Мўғулистон пойтахтида Ўзбекистон кўргазмалар зали ва савдо уйи тантанали равишда очилди. Очилиш маросимини Жамшид Ходжаев ва Саинбуянгин Амарсайхон олиб боришди.
Майдони 1053 квадрат метр бўлган кўргазмалар залида тўқимачилик, қишлоқ хўжалиги, чарм-пойабзал, қурилиш, электротехника, мебелсозлик, фармацевтика, автомобилсозлик ва тоғ-кон саноати каби тармоқлардаги Ўзбекистон корхоналари маҳсулотлари намойиш этилди. Янги савдо уйи мамлакатлар ўртасидаги савдо-иқтисодий алоқаларни мустаҳкамлаш, Ўзбекистон маҳсулотларини Мўғулистон бозорига экспорт қилишни кенгайтириш учун мўлжалланган.
