gov.kz сайти фотосурати
Қозоғистонда қурилиши режалаштирилган 2,4 ГВт қувватга эга биринчи атом электр станциясининг (АЭС) қиймати камида 14 миллиард долларни ташкил этади. Бу ҳақда республика Атом энергияси агентлиги раиси Алмасадам Саткалиев маълум қилди, дея хабар беради «Курсив.kz».
«Харажат ТИА (техник-иқтисодий асослаш – таҳр.изоҳи) асосида аниқланади. Яъни, ҳозир бизда сотувчилар танлов жараёнларида иштирок этишнинг бир қисми сифатида тақдим этган индикатив параметрлар бор. Ҳозир уларни эълон қила олмаймиз, чунки улар иштироки махфийлик шартномалари билан ҳимояланган. Аммо, жаҳон амалиётидан келиб чиқадиган бўлсак, бу даражадаги минимал харажатлар тахминан 14 миллиард долларни ташкил этади», — деди у.
АЭСни Олмаота вилояти, Жамбил тумани, Улкен қишлоғида, Балхаш кўли қирғоғида қуриш режалаштирилган. Станция қурилиши бўйича консорциум етакчиси сифатида «Росатом» танланган, чунки у энг мақбул таклифни тақдим этган. Қурилишнинг дастлабки муддати етти йилни ташкил этади.
Саткалиев Қозоғистон Россиянинг «Росатом» компаниясини халқаро консорциум етакчиси сифатида танлаганини, жумладан, «қурилиш муддати тўғрисида»ги таклиф сабаб бўлганини эслатди. Иккинчи АЭС Хитойга берилиши режалаштирилган, бироқ хитойлик ҳамкорлар билан музокаралар олиб борилгандан кейингина қурилиш қиймати ҳақида гапириш мумкин бўлади.
