autotravel.ru сайти фотосурати
Ўзбекистонда Қашқадарё ва Самарқанд вилоятларини боғловчи Тахтақорача довони орқали пуллик туннел қурилиши режалаштирилган. Бу ҳақда Олий Мажлис Қонунчилик палатасининг мажлисида республика Транспорт вазири Илҳом Махкамов маълум қилди, деб ёзади Daryo.uz парламент қуйи палатасининг Телеграм-каналига таяниб.
Вазирлик бошлиғи туннел узунлиги етти километр бўлишини маълум қилди. Лойиҳа давлат-хусусий шериклик асосида амалга оширилади. Бу участка орқали ўтиш пуллик бўлиши кутилмоқда, дея таъкидлайди расмий.
Махкамовнинг сўзларига кўра, ҳозирда пудратчи ташкилотни аниқлаш бўйича тендер ўтказилмоқда. Танловда учта корхона иштирок этмоқда, улар лойиҳанинг техник-иқтисодий асосларини тайёрлашмоқда.
Вазирнинг депутатларни ишонтиришича, тендер натижалари август ойида якунланади, шундан сўнг унинг ғолиби туннел қуриш ҳуқуқини қўлга киритади.
«Жорий йили лойиҳа ҳужжатларини тайёрлаймиз, иштирокчини танлаймиз ва у билан шартнома тузамиз», — дея қўшимча қилди Транспорт вазирлиги раҳбари.
Ўзбекистон президенти Шавкат Мирзиёев 2023 йили Тахтақорача довонида туннел қуриш бўйича топшириқ бундан тўрт йил аввал берилганини мутасаддиларга эслатиб, тегишли идоралар вакилларини сармоя жалб этишда сусткашликка йўл қўйишаётганини танқид қилганди.
