«Қайрат» ўйинчиси. vesti.kz сайти фотосурати
Қозоғистоннинг «Қайрат» футбол клуби УEФА Чемпионлар лигасининг биринчи саралаш босқичи жавоб учрашувида Словениянинг «Олимпия» жамоасини 2:0 ҳисобида мағлуб этди ва икки ўйиннинг умумий ҳисобига кўра турнирнинг навбатдаги саралаш босқичига йўл олди.
Люблянадаги биринчи учрашув 1:1 ҳисобида якунланган эди. Натижа «Қайрат» учун анча қулай бўлди, Словения чемпионидан анчагина қаршилик кутилганди, бироқ бир қанча етакчиларнинг четга сотилгани туфайли таркибдаги жиддий ўзгаришлар ўзини билдирди.
Олмаотадаги ўйинда қозоғистонлик футболчилар сафардагидан ҳам ишончлироқ кўринишди. Бешинчи дақиқадаёқ бразилиялик Жоржиньо мезбонларни ҳисобда олдинга олиб чиқди. 31-дақиқада бразилиялик легионер ёрдамчи сифатида ҳаракат қилиб, Александр Мринскийга голли узатма берди. Словенлар ҳисобни ўзгартиришга ҳаракат қилишди, тўпга кўпроқ эгалик қилишди, аммо натижа бўлмади.
«Қайрат» иккинчи саралаш босқичига йўл олди ва у ерда Финляндиянинг КУпС клубига қарши баҳс олиб боради. Учрашувлар 22 ва 29 июль кунлари бўлиб ўтади. Ушбу ўйин ғолиби учинчи саралаш босқичида ўз мамлакатининг олтита чемпионидан бири билан ўйнайди: «Копенгаген» (Дания), «Црвена Звезда» (Сербия), «Ференцварош» (Венгрия), «Слован» (Словакия), «Маккаби Тел-Авив (Исроил), «Қарабах» (Озарбайжон).
Эслатиб ўтамиз, 17 июль куни «Актўбе» Европа Лигаси доирасида Польшанинг «Легия»сига (биринчи ўйин 0:1) ва Конференция лигаси доирасида «Ордабаси» Грузиянинг «Торпедо Кутаиси» жамоасига (биринчи ўйин 3:4) қарши Европа лигаси доирасидаги жавоб учрашувларини ўтказади.
