Аббос Файзуллаев ва Элдор Шомуродов. uzdaily.uz сайти фотосурати
Ўзбекистон терма жамоаси ярим ҳимоячиси Аббос Файзуллаев фаолиятини Туркиянинг «Истанбул Башакшеҳир» клубида давом эттиради. Бу ҳақда «Спорт-Экспресс» хабар берди.
Туркия клуби ўзбекистонлик футболчининг трансфери учун Москванинг ЦСКА клубига 7,5 миллион евро тўлаган. Икки йил аввал «армиячилар» Файзуллаев учун «Пахтакор»га 500 минг евро тўлаганди.
«Фарғона» маълумотига кўра, Аббоснинг «Башакшеҳир» билан шартномаси 2030 йилгача амал қилади.
Эслатиб ўтамиз, аввалроқ турк клуби Италиянинг «Рома» клубидан яна бир ўзбекистонлик футболчи – ҳужумчи Элдор Шомуродовни ижарага олганди. Шомуродов ўз интервьюсида Аббоснинг «Башакшеҳир»га ўтиши ва бирга ўйнаш имкониятидан хурсанд эканини айтган.
«Агар бу трансфер амалга ошса, ажойиб иш бўларди. Аббос учун ҳам, мен учун ҳам. Терма жамоадаги шеригингиз сиз билан бир клубда ўйнаса, бу жуда фойдали. Масалан, Европани оладиган бўлсак, Лотин Америкаси футболчилари бирга ўйнашганда доимо бир-бирини қўллаб-қувватлашади. Мени доим бир нарса қизиқтирган. Довбик «Рома»га келганида биз гаплашгандик. Аммо ватандош бу бошқа масала. Умуман, бу Аббос учун фойда беради. Туркия чемпионига РПЛдан кучлироқ. Клуб Конференция лигасида ўйнайди, бу ўзингни синаб кўриш учун яхши имкониятдир», — дейди Элдор.
Ўтган мавсумда «Истанбул Башакшеҳир» Суперлигани 5-ўринда якунлади ва келгуси мавсумда УEФА Конференция Лигаси саралашида иштирок этади. Аббосда ҳозирча еврокубокларда ўйнаш тажрибаси йўқ, чунки Россиянинг Украинада махсус ҳарбий операция ўтказаётгани сабаб рус футбол клублари мусобақалардан четлатилган. ЦСКА Россия кубогини қўлга киритган ва Европа лигасида иштирок этиши керак эди.
ℹ️ Аббос Файзуллаев — «Пахтакор»да тарбия топган, у билан уч карра Ўзбекистон чемпиони бўлган. 2023 йил август ойида у Москванинг ЦСКА клубига ўтган ва у ерда жамоа етакчиларидан бирига айланди. Файзуллаев Ўзбекистон олимпия ва асосий терма жамоаларининг асосий футболчиси ҳисобланади ва улар таркибида 25 та ўйин ўтказиб, 8 та гол урган ва 2 та голли узатма муаллифи саналади.
