«Аҳал» футболчилари. «Аҳал» матбуот хизмати фотосурати
Туркманистон ҳукумати «Аҳал» футбол клубига Туркиядаги йиғинга боришни тақиқлади.
Жамоа 28 июлдан 10 августга қадар Туркиянинг Кожаэли шаҳрида йиғин ўтказиши керак эди. «Аҳал»нинг сафарга чиқишини тақиқлаш сабаблари малум қилинмаган. Бироқ, «Фарғона»га айтишларича, баъзи «рақобатчилар» шундай қарор берилишига таъсир кўрсатган бўлиши мумкин.
Айни пайтда «Аҳал» иккинчи ОЧЛ саралашига тайёргарлик кўриши керак. Тожикистоннинг «Регар-ТадАЗ» жамоасига қарши ўйин 12 август куни бўлиб ўтади. Ғолиб жамоа мусобақанинг гуруҳ босқичига, мағлуб бўлган эса ОФК Чақирув лигаси гуруҳ босқичига йўл олади.
Туркманистон жамоаларига кўпинча пулни тежаш мақсадида йиғинларда қатнашишга рухсат берилмайди. Аммо бу йил туркманистонлик халқаро клуб турнирларининг уч нафар иштирокчиси ҳам хориждаги йиғинларда қатнашиш учун рухсат олгани хабар қилинганди. Булар қаторига «Аҳал»дан ташқари, иккинчи Чемпионлар лигаси гуруҳ босқичида иштирок этадиган «Аркадаг» ҳамда ўтган мавсумда «Аркадаг»нинг турнирдаги ғалабаси эвазига Чақирув лигаси гуруҳ босқичида иштирок этиш ҳуқуқини қўлга киритган «Олтин Асир» ҳам киради.
Бироқ, бу ерда ҳам баъзи чекловлар мавжуд бўлди. «Фарғона» хабарига кўра, клубларга 35 нафардан кўп бўлмаган одамни йиғинга олиб кетишга рухсат берилган. Бу жуда оз. Агар мураббий ва ходимлар ҳисобга олинмаса, 25 нафардан ортиқ футболчи кетмайди. Бу эса мавсум учун берилган аризадан кам иштирокчи. Ёш футболчиларни ҳам кўздан кечириб бўлмайди.
Қизиғи шундаки, «Аркадаг» ҳам, «Олтин Асир» ҳам йиғинга боришади. Ягона нарса шуки, «Олтин Асир» Руминияга эмас, Грузияга боради. «Аркадаг» Болгарияда йиғин ўтказади. Аввалроқ мамлакат ўсмирлар терма жамоалари хориж йиғинларида қатнашиш ҳуқуқини қўлга киритишганди.
