Бахтиёр Зайнутдинов. rsport.ria.ru сайти фотосурати
Қозоғистон терма жамоаси ва Туркиянинг «Бешиктош» клуби ярим ҳимоячиси Бахтиёр Зайнутдинов фаолиятини Москванинг «Динамо»сида давом эттиради. Бу ҳақда инсайдер Иван Карпов хабар берди.
Карповнинг сўзларига кўра, трансфер қиймати бонуслар билан бирга 2,5 миллион еврони ташкил этган, бонуслар миқдори аниқланмаган. Футболчининг клуб билан тузган шартномаси муддати 2029 йилгача мўлжалланган.
Эслатиб ўтамиз, Зайнутдиновнинг трансферига аввалроқ футболчи билан Ростовда бирга ишлаган «Динамо» бош мураббийи Валерий Карпин ниҳоятда қизиққан эди. Футболчига Москванинг «Спартак» ва ЦСКА, шунингдек, Санкт-Петербургнинг «Зенит» клублари қизиқиш билдиришган, бироқ у трансфердан бош тортган. Футболчининг агентига кўра, Зайнутдинов фаолиятини Европа лигаларида давом эттиришни режалаштирган.
Бахтиёр Зайнутдинов «Тараз»да тарбия топган. 2018 йили у «Астана» жамоасида ўйнаган ва у билан Қозоғистон чемпионатида олтин медалларни қўлга киритган. 2019 йили у «Ростов» клубига кўчиб ўтади. Зайнутдинов жамоа билан бир ярим йил давомида барча турнирларда 35 та ўйин ўтказиб, 4 та гол уришга муваффақ бўлган. 2020 йили у Москванинг ЦСКА клубига ўтган ва у ерда асосий ўйинчилардан бирига айланган. 2024 йили Зайнутдинов «Бешиктош» томонидан сотиб олинди, бироқ футболчининг фаолияти у ерда натижа бермади, у ҳимоячи сифатида қайта тайёрланишига тўғри келди ва у жароҳатлардан азият чекди. 27 ёшли футболчи Қозоғистон терма жамоаси сафида 42 та ўйин ўтказиб, 14 та гол урган.
