Юсуф Отубанжо. fcpyunik.am сайти фотосурати
«Насаф» футбол клуби сўнгги икки йил давомида Арманистон чемпионати тўпурари бўлиб келаётган нигериялик 32 ёшли ҳужумчи Юсуф Отубанжо билан шартнома имзолади.
Бундан ташқари, «Насаф» албаниялик вингер Аденис Шала, шунингдек, нигериялик ҳимоячи Кингсли Сокари билан шартнома имзолаганини элон қилди.
Эслатиб ўтамиз, аввалроқ БААнинг «Бани Яс» клубига ўтган Ўзбекистон Суперлигасининг энг қиммат футболчиси Акмал Мозговой, албаниялик ҳужумчи Рубин Хебай ва вингер Ислом Кенжабоев жамоани тарк этганди. Шу тариқа, клуб асосий ўринларда таркибни мақсадли кучайтиришни амалга оширди.
«Насаф» Ўзбекистоннинг амалдаги чемпиони ҳисобланади. Жамоа миллий чемпионатнинг жорий мавсумида ҳам пешқадамлик қилмоқда ва кузда элит ОФК гуруҳ босқичида дебют қилади.
Юсуф Отубанжо «Жилина» таркибида Словакия чемпиони бўлган, шунингдек, «ЛАСК» ва «Залцбург»да ўйнаб, икки марта Австрия чемпионатида кумуш медални қўлга киритган. Ереваннинг «Пюник» таркибида у икки марта Арманистон чемпионлигини қўлга киритган ва икки йил кетма-кет лиганинг энг яхши тўпурарига айланган.
