Битимни имзолаш маросими. afghanislamicpress.com сайти фотосурати
Туркманистон ва Афғонистонни бошқараётган «Толибон»* ҳаракати Турғунди портида инфратузилмани ривожлантиришга қаратилган битим имзолади. Режага кўра, модернизация учун 5 миллион доллар сарфлаш кўзда тутилган, дея хабар беради Ariananews.
Битимни Афғонистон жамоат ишлари вазирлигининг темир йўл бошқармаси ва «Демирёллары» давлатга қарашли туркман темир йўллари компанияси вакиллари имзолаган. Ушбу битим икки мамлакат темир йўл тармоқларини мослаштириш ва трансчегаравий савдони оптималлаштириш бўйича икки томонлама йирик саъй-ҳаракатларнинг бир қисмидир.
Келишув доирасида Туркманистон компанияси Турғунди-Ҳирот темир йўли бўйлаб замонавий юк ташиш иншоотлари, жумладан, омборларни лойиҳалаштириб, қуради. Ушбу чора-тадбирлар портнинг сиғимини ва самарадорлигини оширади.
Учрашувда Турғунди портини ривожлантириш Афғонистонни минтақавий савдо-сотиқ учун қуруқликдаги кўприкка айлантириш йўлидаги муҳим қадам экани қайд этилди. Яхшиланган инфратузилма порт орқали импорт ва экспорт ҳажмини оширишга ҳамда Афғонистоннинг трансчегаравий логистикадаги ролини кучайтиришга, хусусан, Жанубий ва Марказий Осиё ўртасидаги транзит ташиш самарадорлигини оширишга ёрдам бериши керак.
Ҳозирда Афғонистонда тўртта трансчегаравий темир йўл участкаси фаолият кўрсатмоқда:
👉 Ўзбекистоннинг Термиз шаҳридан Ҳайратон чегара пункти орқали Мозори Шариф шаҳригача бўлган 75 километрлик темир йўл;
👉 Эроннинг Хаф шаҳридан Афғонистоннинг Ҳирот шаҳригача бўлган қарийб 150 километрлик йўл;
👉 Туркманистондан Афғонистонга яна иккита темир йўл участкаси олиб боради: Серхетободдан (собиқ Кушка) Турғундигача бўлган 10 километрлик йўналиш ва Керкидан Андхойгача бўлган 58 километрлик йўналиш.
Бу темир йўл участкаларининг барчаси чет эллик ҳомийлар ва хорижий компаниялар томонидан қурилган.
*бир қатор мамлакатларда террорчи сифатида тан олинган ва тақиқланган ташкилот
