Orda.kz коллажи
Қозоғистон президенти Қосим-Жомарт Тўқаев украиналик ҳамкасби Владимир Зеленский билан телефон орқали мулоқот қилди, деб хабар беради Оқўрда матбуот хизмати.
Суҳбат Киев ташаббуси билан бўлиб ўтди. Унда Россия-Украина можаросини тартибга солиш истиқболлари муҳокама қилинди.
«Қосим-Жомарт Тўқаевнинг сўзларига кўра, ҳозирги ўта оғир вазиятда Украина давлатчилигининг сақланиши ва ҳимоя қилинишини таъминлаган ҳолда, можаронинг ечимига мувозанатли ва оқилона ёндашиш муҳим. Унинг фикрича, барча томонлар «Яхши жанжалдан кўра ёмон тинчлик афзал» деган қадимий ҳикматга амал қилишлари керак», — дейилади баёнотда.
Тўқаев ҳудудий муаммонинг мураккаблигини тўлиқ англашини, бу халқаро муносабатлардаги энг қийин масала эканини, кўпинча тинчлик ва ҳатто сулҳ бўйича келишувга эришиш йўлидаги енгиб бўлмас тўсиқга айланиб қолаётганини таъкидлади. «Аммо ҳозир асосий устувор вазифа Украина хавфсизлигининг мустаҳкам халқаро кафолатлари асосида Украина давлатчилигини сақлаб қолишдир», — деди президент.
Унинг сўзларига кўра, Қозоғистон Украина билан томонларни қизиқтирган турли соҳаларда фаол ҳамкорликни давом эттириш ниятида.
Ўтган ҳафта Россия президенти Владимир Путин Тўқаевга қўнғироқ қилиб, АҚШ билан Украина бўйича музокараларнинг боришини муҳокама қилди. 15 август куни Аляскада АҚШ президенти Дональд Трамп ва Владимир Путин ўртасидаги учрашув режалаштирилган бўлиб, у ерда Россия-Украина можаросини тартибга солиш муҳокама қилиниши кутилмоқда.
Токаев бир неча бор Россия ва Украина ўртасидаги можаро юзасидан сиёсий мулоқот ўтказишга чақирган. Январь ойи бошида «Ана тілі» газетасига берган интервьюсида у Россияни жанг майдонида мағлуб этиб бўлмайди, деган позициясини яна эслади. Тўқаев, шунингдек, бу масалани Трамп билан 2024 йилги АҚШ сайловларидан сўнг бўлиб ўтган телефон суҳбатида муҳокама қилганини эслатди. Ўшанда Қозоғистон раҳбари бу ўта мураккаб муаммонинг ечими «низолашаётган давлатлар раҳбарларининг ва, албатта, жаҳон қудрати етакчиси сифатида Трампнинг иродаси ва хоҳишига» боғлиқлигини таъкидлаганди.
Шу йилнинг февраль ойида Қозоғистон раҳбари Россия Федерацияси ва АҚШ президентлари ўртасида Украина атрофидаги вазият бўйича бошланган мулоқотни олқишлаган эди.
