infozakon.kz сайти фотосурати
Қозоғистоннинг Туркистон вилояти суди ер ости туннели орқали Ўзбекистонга бензин олиб ўтган уюшган жиноий гуруҳ ишини кўриб чиқди. Уюшган жиноий гуруҳ раҳбари 15 йилга озодликдан маҳрум этилди, гуруҳнинг бошқа аъзолари ҳам қамоқ жазосига ҳукм қилинди, деб ёзади Tengrinews.kz вилоят суди матбуот хизматига таяниб.
Тергов маълумотларига кўра, ўтган йил июль ойида пировардида жиноий гуруҳ раҳбари сифатида тан олинган қозоғистонлик шахс Ўзбекистон фуқароси билан тил бириктириб, қўшни давлатга ёқилғини ноқонуний ўтказишни ташкил қилган. Кейинчалик гумонланувчилар сафига яна бир неча киши қўшилган. Шундай қилиб, трансмиллий уюшган жиноий гуруҳ тузилган.
Жиноятчилар Туркистон вилоятининг Сариоғаш туманидаги Сарқирама қишлоғида Қозоғистонни Ўзбекистон билан боғловчи 375 метр узунликдаги ер ости қувурини ётқизишган. Контрабандачилар 2024 йил август-декабрь ойларида 420 тоннадан ортиқ АИ-92 бензинини четга олиб ўтишган. Ушбу ҳажмдаги ёқилғининг умумий қиймати 112 миллион тенгени (208 минг доллар) ташкил этган.
Прокурор жиноий гуруҳ раҳбарини 15 йилдан, шерикларини эса 12 йилдан озодликдан маҳрум қилишни сўраган. Суд мажлисида иш бўйича айбланувчилар ўз айбларини тан олмай, оқлов ҳукмини талаб қилишган. Ҳукмни чиқаришда айбланувчиларнинг ёш болалари борлиги кўринишидаги енгиллаштирувчи ҳолатлар ҳисобга олинган.
Шунга қарамай, контрабанда схемаси ташкилотчисига 15 йил, уюшган жиноий гуруҳнинг бошқа аъзоларига эса 13 йил қамоқ жазоси берилди. Бундан ташқари, жиноятчилардан 3 миллион тенге (5,5 минг доллар), 16 минг литр бензин, ЗИЛ ва ГАЗ русумли юк машиналари олиб қўйилди. Барча мол-мулк давлат фойдасига мусодара қилинди.
Ҳукм ҳали қонуний кучга кирмаган, дея аниқлик киритади қозоқ нашри.
Шу йилнинг июль ойида Қозоғистон Ўзбекистон билан чегарадаги ер ости туннелидан ноқонуний равишда нефть маҳсулотларини олиб ўтиш бўйича текширувни якунлагани хабар қилинган эди. Терговчилар қўшимча қилишича, жиноятчилар икки ой ичида «чет элдан молиялаштириш, логистика ва ёқилғи-мойлаш материалларини экспорт қилишдан иборат» барқарор контрабанда схемасини ўрнатган.
