yuz.uz сайти фотосурати
Олмаота шаҳрининг Олмали туман суди Қозоғистонда атом электр станцияси қурилишига қарши чиққан беш нафар фаолнинг ҳар бирига 4 йилдан озодликни чеклаш жазосини берди. Прокурор айбланувчига 5 йил қамоқ жазосини талаб қилган бўлса-да, деб ёзади Orda.kz.
Нашрнинг эслатишича, Айдар Мубораков, Нурлан Жауилбаев, Фазилжон Сидиқов, Нурлан Темиргалиев ва Жанат Казакбай оммавий тартибсизликлар уюштиришга уринишда айбланган. Қайд этилишича, акция ўтган йил 6 октябрига – республикада АЭС қуриш масаласи бўйича овоз бериш кунига режалаштирилган.
Бундан ташқари, тергов маълумотларига кўра, фаоллар куч ишлатиш, ўт қўйиш, мулкни йўқ қилиш, қурол ва портловчи моддаларни қўллаш, ҳокимиятга қуролли қаршилик кўрсатиш билан тартибсизликлар уюштиришни мақсад қилишган.
Айбланувчилар — пенсия олди ва пенсия ёшидаги эркаклар — прокуратура даъволарига қўшилмаган. Улар фақат АЭСга қарши эканликларини тасдиқлаганлар, лекин ҳеч қандай тартибсизлик уюштириш ниятидада бўлишмаган. Айрим фаоллар таъкидлашича, улар фуқаролик позицияси сабаб таъқибга учрашган. Шу билан бирга, адвокатлар ўз ҳимоясини хавфсизлик кучларида айбланувчига қарши ҳеч қандай ашёвий далил йўқлигига асослашган.
Натижада судя Ернар Қосимбеков иш бўйича ҳар бир айбланувчига 4 йиллик озодликни чеклаш жазосини тайинлаган. Ҳукм эълон қилингач, суд залида ҳозир бўлган фуқаролар қарсак чалишди, дея қўшимча қилади ОАВ.
2024 йил 6 октабрга белгиланган АЭС масаласи бўйича референдум арафасида Қозоғистоннинг олтита шаҳри – Олмаота, Ақтўбе, Павлодар, Петропавловск, Уралск ва Чимкентнинг ҳокимликлари фаолларга АЭС қурилишига қарши митинглар ўтказишга рухсат беришмаган. Шунга қарамай, фуқаролар акция ўтказишган ва энергетика объекти қурилишига қарши бўлганлар оммавий ҳибсга олинган. Масалан, Олмаотада 10 дан ортиқ одам полиция бўлимига олиб кетилган ва уларнинг беш нафари охир-оқибат жиноий иш бўйича айбланувчига айланган.
Ўтган йил 7 октябрь куни Қозоғистон Марказий сайлов комиссияси овоз беришда иштирок этган мамлакат аҳолисининг 71 фоиздан ортиғи республикада АЭС қурилиши ғоясини қўллаб-қувватлагани ҳақида хабар берган эди.
