Подшоҳ Абдулла II ва Шавкат Мирзиёев. Ўзбекистон президенти матбуот хизмати фотосурати
Ўзбекистон Республикаси Президенти Шавкат Мирзиёев ва Иордания Ҳошимийлар Подшоҳлиги Подшоҳи Абдулла II ибн ал-Ҳусайн ўзаро визасиз режим жорий этиш ва икки давлат пойтахтлари – Тошкент ва Амман шаҳарлари ўртасида авиақатновлар сонини кўпайтиришга келишиб олди. Давлат раҳбарларининг Самарқандда бўлиб ўтган музокаралари чоғида бу борадаги келишувларга эришилди, деб хабар беради Марказий Осиё республикаси раҳбари матбуот хизмати.
Учрашувда дипломатик муносабатлар тарихидаги илк олий даражадаги ташриф икки томонлама ҳамкорликда янги босқични бошлаб бериши ва уни кенг қамровли шериклик даражасига кўтаришга хизмат қилиши таъкидланди.
Етакчилар БМТ, Ислом ҳамкорлик ташкилоти ва бошқа халқаро тузилмалар доирасида самарали ҳамкорлик олиб борилаётганини мамнуният билан қайд этиб, ташаббусларни ўзаро қўллаб-қувватлашни фаол давом эттириш зарурлигини таъкидладилар.
Мирзиёев ва унинг меҳмони Ташқи ишлар вазирлиги ва бошқа идоралар даражасида мутасаддилар томонидан олиб борилаётган ишлар фаоллашгани ҳақида сўз юритиб, ўзаро товар айирбошлаш кўрсаткичларини ошириш, қўшма инвестиция лойиҳалари ва савдо шартномаларини амалий амалга оширишга тайёр эканликларини тасдиқладилар.
Кимё ва тўқимачилик саноати, «ақлли» қишлоқ хўжалиги, геология, соғлиқни сақлаш ва фармацевтика, туризм ва бошқа тармоқларда кооперацияни кенгайтиришга келишиб олинди.
Учрашувда Ҳукуматлараро комиссия ва Ишбилармонлар кенгашини ишга тушириб, жорий йил якунигача уларнинг илк йиғилишларини ўтказиш таклифи билдирилди. Икки мамлакатнинг етакчи компания ва ишлаб чиқарувчилари иштирокида Ўзбекистон–Иордания бизнес форумининг ўтказилиши ишбилармон доиралар ўртасида узоқ муддатли шериклик алоқаларини ўрнатишга хизмат қилади.
Бундан ташқари, маданий ва туристик алмашинувлар, жумладан, умумий маънавий меросни ўрганиш бўйича ҳамкорликни ривожлантириш контекстида муҳокама қилинди. Томонлар бағрикенг ва маърифатли ислом ғояларини биргаликда илгари суриш зарурлиги ҳақида якдил фикрга келдилар. Давлат раҳбари Подшоҳ Абдулла II томонидан бундан 10 йил олдин бошланган «Ақаба жараёни» ташаббусини юқори баҳолаб, ушбу муҳим ташаббуснинг навбатдаги йиғилишларидан бирини Самарқанд шаҳрида ўтказишни таклиф этди.
Музокаралар якунида Мирзиёев ва Подшоҳ Абдулла II ибн ал-Ҳусайн Шериклик муносабатларини мустаҳкамлаш тўғрисида қўшма баёнот қабул қилдилар.
Ташриф доирасида 15 та икки томонлама ҳужжатлар имзоланди, жумладан:
✅ Экстрадиция тўғрисида битим;
✅ Инвестицияларни ўзаро рағбатлантириш ва ҳимоя қилиш тўғрисида битим;
✅ Виза талабларини бекор қилиш тўғрисида битим;
✅ Олий таълим ва илмий тадқиқотлар соҳасида ҳамкорлик тўғрисида битим;
✅ Туризм соҳасида ҳамкорлик тўғрисида битим;
✅ Ҳаво қатнови тўғрисидаги ҳукуматлараро битимга ўзгартиришлар киритиш тўғрисида баённома;
✅ Стандартлаштириш, метрология ва мувофиқликни баҳолаш соҳасида меморандум.
Иордания Подшоҳи Абдулла II ибн ал-Ҳусайннинг Ўзбекистонга ташрифи 25 август куни бошланган. Меҳмон «Абадий шаҳар» тарихий-этнографик боғи, Шоҳи-Зинда мажмуаси, Амир Темур мақбараси, Регистон меъморий ансамблини зиёрат қилиш орқали Самарқанднинг диққатга сазовор жойлари билан танишишга муваффақ бўлди.
26 август куни Иордания Подшоҳи Абдулла II ибн ал-Ҳусайн Ўзбекистон Республикаси президенти Шавкат Мирзиёев ҳамроҳлигида Ўзбекистонда ишлаб чиқарилган экспортбоп маҳсулотлар кўргазмаси билан танишди. Хусусан, кўргазмада дори воситалари, тиббий асбоб-ускуналар, минерал ўғитлар, тўқимачилик, трикотаж ва заргарлик буюмлари, ҳунармандчилик маҳсулотлари, IT ечимлари ва бошқалар ўрин олганди. Қайд этилишича, Иордания етакчиси Ўзбекистон маҳсулотлари ва саноат салоҳиятини юксак баҳолаган.
