Ханжар. cisc.uz сайти фотосурати
Тошкентдаги Ислом цивилизацияси маркази музейи коллекцияси олтин ва қимматбаҳо тошлар билан безатилган Бобурийлар даврига оид ноёб ханжар билан тўлдирилди. Бу ҳақда марказ матбуот хизмати хабар берди.
Нефрит, олтин, қимматбаҳо тошлар ва пўлатдан ишланган бу ноёб артефакт 38 сантиметр узунликка эга бўлиб, пичоқ қисми 24,5 сантиметрни ташкил қилади. Ҳар бир нақш ва безаги ўша даврнинг зодагонлик маданияти, эстетик қарашлари ҳамда юксак бадиий дидини намоён этади.
Ханжар Ҳиндистонда XVIII асрда Бобурийлар ҳукмронлиги даврида ясалган. Ислом цивилизацияси маркази вакиллари ушбу кўргазмани Sotheby's аукцион уйида бўлиб ўтган ким ошди савдоси чоғида ўша даврга оид яна икки ханжар ва нефритдан ясалган ханжар дастаси билан бирга сотиб олди.
«Экспонат ҳарбий жиҳатдан қимматли бўлишидан ташқари, санъат асари сифатида ҳам юксак аҳамият касб этади. Ушбу ноёб асар Ислом цивилизацияси марказининг қўлёзмалар, бадиий ва тарихий экспонатларидан иборат хазинасини янада бойитади», — дейилади ИЦМ хабарида.
ℹ️ Ислом цивилизацияси маркази Ўзбекистон президенти Шавкат Мирзиёев ташаббуси билан маърифий исломни эзгулик, тинчлик ва бағрикенглик дини сифатида тарғиб этиш ғояси доирасида амалга оширилаётган лойиҳадир. Марказ биносида музей жойлашган.
