Шавкат Мирзиёев Ислом цивилизацияси марказида. Ўзбекистон президенти матбуот хизмати фотосурати
Ўзбекистон президенти Шавкат Мирзиёев қурилиш ишлари якунланиб бораётган Ислом цивилизацияси марказига ташриф буюрди. Бу ҳақда республика раҳбари матбуот хизмати хабар берди.
Мирзиёев ташриф чоғида дин арбоблари, марказ ходимлари, жумладан, ташкилот раҳбари Фирдавс Абдухолиқов билан учрашди. Президентни бинонинг безаклари, залдаги фрескалар, қатор музей экспонатлари, ноёб кутубхона, шунингдек, энг сўнгги технологиялар билан жиҳозланган анжуманлар зали билан таништирдилар.
Президент қурилиш ишларига юксак баҳо бериб, Марказ фаолиятини пухта ташкил этиш, унинг мазмун-моҳиятини мунтазам бойитиб бориш зарурлигини таъкидлади.
«Саккиз йил давомида бу ерда катта меҳнат қилинди. Шундай салобатли ва чуқур мазмунли марказ қурдик. Бу ерга келадиган меҳмонлар халқимизнинг бой тарихи, аждодларимиз билим ва тафаккурига тан беради, ўзига катта маънавий қувват олади. Ўзбекистон улуғ тарихга эга. Буюк аждодларимиз томонидан яратилган илмий ва маданий мерос инсоният тарихида ўчмас из қолдирган. Улар билан дунё ҳамжамиятини хабардор қилишда ушбу марказнинг ўрни беқиёс бўлишига ишонаман», – деди Шавкат Мирзиёев.
Давлат раҳбари марказга туташ ҳудудда барпо этилган савдо ва хизмат кўрсатиш иншоотлари билан ҳам танишди.
Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказнинг энг асосий қисмида Қуръони карим зали бунёд этилмоқда. Бу ерда 460 ўринли анжуманлар зали ҳам қуриб битказилди. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
