t.me/oilgazKZ фотосурати
Пекинда «Газпром» ва Хитойнинг CNPC компанияси ўртасида «Сила Сибири-2» газ қувурини қуриш бўйича келишувлар Қозоғистоннинг шимоли-шарқини Россия хомашёсидан фойдаланган ҳолда газлаштириш режаларига тўсқинлик қилиши мумкин. Бу фикрни қозоғистонлик журналист Олег Червинский ўзининг «Қозоғистон нефть ва гази. Фактлар ва шарҳлар» Telegram-каналида билдирди.
2 сентябрь куни CNPC ва «Газпром» ўртасида Мўғулистон орқали ўтадиган «Сила Сибири-2» ва «Союз Восток» транзит газ қувурини қуриш бўйича қонуний кучга эга меморандум имзоланди. Унга кўра, Россия гази Хитойга 30 йил давомида йилига 50 миллиард куб метр ҳажмда етказиб берилади. Томонлар, шунингдек, «Сила Сибири» орқали етказиб бериш ҳажмини 38 миллиарддан 44 миллиард куб метргача, «Восточный маршрут» бўйлаб йилига 10 миллиарддан 12 миллиард куб метргача оширишга келишиб олдилар.
Шундай қилиб, деб ёзади Червинский, мамлакатнинг шимоли-шарқий вилоятларини газлаштириши керак бўлган Россиянинг Қозоғистон орқали Хитойга газ қувурини ўтказишига энди эҳтиёж қолмади. «Ягона вариант – «Сариарқа» газ қувурининг II-III босқичларини амалга ошириш қолди, бунинг учун ҳозирча на пул, на газ ресурслари мавжуд», — дея қўшимча қилади журналист.
Россиядан Хитойга Қозоғистон орқали газ қувури қурилиши эҳтимоли ҳақида биринчи марта ўтган йили муҳокама қилинган («Силе Сибири-2» бўйича музокаралар ўша пайтга қадар бир неча йиллардан буён давом этаётган эди, бироқ томонлар газ нархи ва етказиб бериш ҳажми бўйича келиша олмаган эди). Ўтган йил кузида «Нишоналар: Россия ва Хитой – ўзаро манфаатли ҳамкорлик» форумида сўзга чиққан Россия Бош вазири ўринбосари Александр Новак лойиҳа ишлаб чиқишнинг дастлабки босқичида эканини айтганди. Шу билан бирга, газ қувурининг қуввати йилига 35 миллиард куб метргача етиши мумкинлиги хабар қилинганди.
Жорий йил февраль ойида Россия ҳукумати сайтида Қозоғистоннинг шимолий ва шимоли-шарқий вилоятларини ёқилғи билан таъминлаш учун магистрал газ қувурини қуриш бўйича буйруқ пайдо бўлган эди.
