Святослав Каверин. @swatslav Telegram-канали фотосурати
Афғонистонда бир ярим ой олдин ҳибсга олинган россиялик этнограф Святослав Каверин қўйиб юборилди ва ҳозирда у Россияга йўл олган. Бу ҳақда BAZA Telegram-каналига хабардор икки манба маълум қилган.
Каверин 19 июль куни Қундуз вилоятида эсдалик сифатида олиб юрган заргарлик буюмларини ноқонуний олиб ўтишда гумонланиб қўлга олинган эди. Афғонистондаги Россия бизнес маркази маълумотларига кўра, ҳибсга «ҳамроҳлик қилаётган шахслар малакаси масаласи» сабаб бўлган: эҳтимол, маҳаллий ҳукумат Каверинга ҳамроҳлик қилаётганларни шубҳали деб ҳисоблаган. Шу билан бирга, толиблар* этнограф ҳибсга олинганини расман тан олмаган ва россиялик дипломатларга унинг қаердалиги ҳақида ҳеч қандай маълумотга эга эмаслигини айтишган. BAZA хабарига кўра, Каверинни Кобулдаги хорижликларни сақлаш марказида ушлаб туришган.
Унинг озод этилишига ким ёрдам бергани ҳақида маълумот йўқ. Этнографнинг онаси Татьяна Каверина август ойи охирида Татаристон раҳбари Рустам Миннихановга ўғлини озод қилишда ёрдам беришни сўраб мурожаат қилганди. Каверинанинг айтишича, унинг Татаристон раҳбарига мурожаат қилганига сабаб, ушбу республика Россия Федерациясининг Афғонистондаги янги ҳокимият —«Толибон»* ҳаракати билан алоқа ўрнатган биринчи субъект бўлганлигидадир. Бунгача Каверина Афғонистоннинг Россиядаги элчихонаси ва Россия Ташқи ишлар вазирлигига мурожаат қилган.
Святослав Каверин — рус этнологи ва Ҳиндукуш халқлари маданияти тадқиқотчиси, Шарқий Афғонистон ва Шимолий Покистон минтақалари бўйича мутахассис. Унинг тадқиқотлари Ҳиндукушнинг бориш қийин бўлган ҳудудларига дала экспедицияларини ўз ичига олади, у ердаги кичик халқларнинг ўзига хос анъаналари, тили, либослари ва этник ўзига хослигини ўрганган.
*Кўпгина мамлакатларда террорчи сифатида тан олинган ва тақиқланган ташкилот.
