Шавкат Мирзиёев. Ўзбекистон президенти матбуот хизмати фотосурати
Ўзбекистон президенти Шавкат Мирзиёев Олий таълим, фан ва инновациялар вазирининг учала ўринбосарини ишдан бўшатди. Шоҳрух Далиев, Отабек Маҳкамов ва Сарвархон Бузрухоновлар давлат раҳбарининг фикрича, соҳадаги ислоҳотларнинг мазмун-моҳиятини тўлиқ англамагани учун ўз лавозимларидан айрилган. Бу ҳақда республика раҳбари ихтисослаштирилган йиғилишда маълум қилди, дея хабар беради унинг матбуот котиби Шерзод Асадов.
«Тўғри, мактабгача ва мактаб таълимида ўзгаришлар бўляпти, дастурлар ишлаяпти, натижалар бор. Лекин касб-ҳунар ва олий таълимга масъул мутасаддилар ҳалигача таълимдаги ислоҳотлар мазмунини тўлиқ тушуниб етгани йўқ», — деди президент.
Шу билан бирга, Олий таълим, фан ва инновациялар вазири Қўнғратбай Шарипов ўз лавозимини сақлаб қолди.
Олий таълим вазирлиги раҳбарининг ўринбосарларидан ташқари ушбу бошқарма ҳузуридаги Инновацион ривожланиш агентлиги директори Шароф Ражаббоев ҳам лавозимидан озод этилди.
Шунингдек, Президент фармони ва қарори билан Президент Администрацияси ҳузуридаги Таълим сифатини таъминлаш миллий агентлиги директори Адхам Худайкулов бошқа ишга ўтгани муносабати билан лавозимидан озод этилди.
Мирзиёев эндиликда мактабгача ва мактаб таълими ҳамда олий таълим, фан ва инновациялар вазирлари, уларнинг ўринбосарлари, ҳокимлар превентив ва проактив ишлашга ўтиб, таълимнинг барча йўналишларида катта ўзгариш қилиши шартлигини таъкидлади.
