inbusiness.kz сайти фотосурати
Тошкент шаҳрининг Сергели туманида она 7 яшар қизини ошхона пичоғи билан уриб ўлдирди. Гап 2022 йили ўз қизалоғини ҳайвонот боғидаги айиқлар қафасигага ташлаган пойтахтлик Зилола Тўлаганова ҳақида кетмоқда, деб ёзади «Газета.uz» Milliy телеканалига таяниб.
Хабарда айтилишича, 34 ёшли тошкентлик аёл болага пичоқ билан жароҳат етказган, шундан сўнг қиз воқеа жойида вафот этган.
Аёл истиқомат қиладиган МФЙ вакили маълум қилишича, аёл 2 август куни руҳий асаб касалликлари шифохонасида даволаниб чиққан. Шифокорлар унга амбулатор даволаниш ёзиб берган. 2 август санасидан бошлаб аёл 2-сон шаҳар руҳий асаб касалликлари диспансерида ҳисобга қўйилган.
«Маҳалла еттилиги» Зилола хонадонига бориб, у билан суҳбатлашган. Аёлнинг ҳолати яхши бўлган, саволларга адекват жавоб берган.
«Биз буни кутмагандик», — дейди маҳалла вакили, бола ўлимини изоҳларкан.
Бош прокуратура матбуот котиби Ҳаёт Шамсутдиновнинг сўзларига кўра, мазкур ҳолат юзасидан Жиноят кодексининг 97-моддаси («Қасддан одам ўлдириш») билан жиноят иши қўзғатилиб, гумонланувчи аёл процессуал тартибда ушланган.
Эслатиб ўтамиз, 2022 йил январь ойида Тошкент ҳайвонот боғида фавқулодда ҳолат юз берган эди. Зилола Тўлаганова тўнғич ўғлининг кўз ўнгида қизини айиқ қафасига ташлаб юборади. Қиз беш метр баландликдан пастга қулаб тушган. Нима бўлаётганини кузатиб турган айиқ зовурга тушиб, қизалоққа яқинлашади, қизчани ҳидлаб, сўнг ундан узоқлашади. Ҳайвонот боғи ходимлари айиқни ички қисмга олиб киришади, қизалоқни зовурдан чиқариб олишади. Қизалоққа очиқ бош мия жароҳати ва бош мия чайқалиши ташхизи қўйилган.
Кейинчалик Тўлаганованинг отаси қизи ёрдам сўраб психиатрга мурожаат қилганини айтган. Унинг сўзларига кўра, қизининг руҳиятидаги ўзгаришларга эри ва қайнонасининг кўп йиллик босими ва калтаклари натижасида юзага келган стресс сабаб бўлган. Аёл ажрашиш учун ариза берган, аммо суд рад жавобини берган.
Тўлагановага нисбатан жиноят иши қўзғатилган. Суд-психиатрия ва психология экспертизасининг кенг қамровли экспертизаси унинг руҳий касалликка чалинганини, тергов ва суд жараёнида кўрсатма беришга қодир эмаслигини аниқлаган. Тошкентлик аёл руҳий касалликлар шифохонасига даволаниш учун юборилган.
Ўша йил апрель ойида суд Тўлагановани телба ҳолатида ижтимоий хавфли қилмиш содир этганликда айбдор деб топиб, аёлни руҳий касалликлар шифохонасига мажбурий даволанишга жўнатган.
