freepik.com сайти фотосурати
Қозоғистонда янги криптофонд Alem Crypto Fund ишга тушди. У Сунъий интеллект ва рақамли ривожланиш вазирлиги томонидан Qazaqstan Venture бошқаруви остида яратилган ва «Астана» халқаро молия маркази (АХММ) экотизимида рўйхатдан ўтган, деб хабар беради вазирлик матбуот хизмати.
Фонд рақамли активларга узоқ муддатли инвестициялар ва захираларни шакллантиришга эътибор қаратади. Келажакда у давлат жамғармалари воситасига айланиши мумкин, «мамлакат келажак молиясини бошқариш имкониятларини кенгайтирган ҳолда», дейилади баёнотда.
Кейинроқ Қозоғистон Миллий банки ҳозирда янги фонд давлат заҳираларини бошқариш ваколатига эга эмаслигини таъкидлади.
«Alem Crypto Fundнинг ташкил этилиши Қозоғистонда рақамли молияни ривожлантириш йўлидаги қадамдир. Мақсадимиз уни йирик инвесторлар учун ишончли восита ва рақамли давлат захиралари учун муҳим пойдеворга айлантиришдир», — дея таъкидлайди Қозоғистон Республикаси Бош вазири ўринбосари, Сунъий интеллект ва рақамли ривожланиш вазири Жаслан Мадиев.
Binance Kazakhstan —глобал Binance экотизимидаги маҳаллий лицензияга эга компания ва рақамли активлар бўйича дунёдаги энг йирик фонднинг стратегик ҳамкорига айланди.
Alem Crypto Fund BNB Chain тармоғининг асосий белгиси бўлган BNBни сотиб олиб, ўзининг биринчи инвестициясини амалга оширди. У транзакциялар, тўловлар ва тармоқни бошқариш учун ишлатилади.
Май ойи охирида президент Қосим-Жомарт Тўқаев криптовалюталардан товарлар, хизматлар ва бошқа мақсадларда харид қилиш учун ишлатилиши мумкин бўлган CryptoCity пилот зонаси яратилишини эълон қилганди. Кейинчалик Рақамли ривожланиш вазири Жаслан Мадиев (бу вазирлик қайта ташкил этилган ва ҳозирда Сунъий интеллект вазирлигини бошқаради) Алатаудан лойиҳа учун таянч шаҳар сифатида фойдаланиш мумкинлигига аниқлик киритди.
Ўтган ёзда Қозоғистон Миллий банки (ҚМБ) истеъмолчиларга «Астана» халқаро молия марказида крипто биржаларида ҳамёнлар билан боғланган нақд пулсиз операцияларни амалга ошириш имконини берувчи криптотўлов картаси лойиҳасини ишга туширди. Ҳозирда у ерда бир нечта крипто хизматлари, жумладан Binanceнинг маҳаллий филиали ва Bybit биржаси рўйхатга олинган.
