frank.uz сайти фотосурати
Ўзбекистон Энергетика вазири Жўрабек Мирзамаҳмудов янги истиқболли лойиҳаларни ҳисобга олган ҳолда америкалик инвесторлар Марказий Осиё республикаси энергетика соҳасига тахминан 3-4 миллиард доллар сармоя киритишга тайёр эканини маълум қилди. Spot.uz нашри «Ўзбекистон 24» телеканалига таянган ҳолда мулозим сўзларини келтиради.
Вазирнинг тушунтиришича, бу кўмирни газлаштириш, газ синтезини ишлаб чиқариш, аммиак, метанол ва бошқа қўшимча қийматли маҳсулотлар ишлаб чиқариш бўйича янги келишувларга тааллуқлидир.
У яна бир қанча ташаббусларни ҳам муҳокама қилган. Хусусан, бурғулаш соҳасида Энергетика вазирлиги замонавий технологиялар, тажриба ва бошқарув усулларини қўллаш бўйича Schlumberger ва Baker Hughes компаниялари билан шартномалар имзолаган.
«Ўзбекнефтгаз» давлат корхонаси ва Американинг Gulf компанияси ўртасида бутун мамлакат бўйлаб ёқилғи қуйиш шохобчалари тармоғини яратиш бўйича меморандум имзоланган. Ушбу лойиҳа 100 миллион долларга баҳоланмоқда.
Тегишли вазирлик газ узатиш тизими ва компрессор станцияларида газ агрегатларини электр двигателларига алмаштириш бўйича олиб борилаётган музокараларда сезиларли ютуқларга эришган. Бундан ташқари, вазирлик раҳбари таъкидлашича, АҚШ Экспорт-импорт банки бу борадаги ишларни молиялаштиришга қизиқиш билдирган.
Мирзамахмудовнинг таъкидлашича, 2-3 йиллик дастур доирасида компрессор станцияларидаги агрегатларни алмаштириш камида 800 миллион долларга тушади. АҚШ Эксимбанки Ўзбекистонга 852 миллион долларлик кредит линияси очишга тайёр эканини маълум қилган.
Вазир шунингдек, Air Products компанияси мамлакат билан ҳамкорликни кенгайтириш ниятида эканлигини қўшимча қилди. Бунга қўшимча инвестициялар ва бизнес йўналишларини диверсификация қилиш киради.
Дарвоқе, Ўзбекистон президенти Шавкат Мирзиёев яқинда АҚШга ташрифи чоғида Air Products компанияси раҳбари Эдуардо Менезес билан учрашган эди.
Қайд этилишича, компаниянинг Марказий Осиё давлатига киритган сармояси 1 миллиард доллардан ошган. GTL заводида саноат газларини қайта ишлаш, Фарғона нефтни қайта ишлаш заводида водород ва «Навоийазот»да суюқ карбонат ангидрид газини ишлаб чиқариш, шокли музлатиш марказини ташкил этиш ишлари амалга оширилган лойиҳалар қаторига киради.
Шу билан бирга, томонлар Бухорода газ-кимё мажмуасини қуриш, кўмирни газлаштириш, тоза авиация ёқилғиси ишлаб чиқаришни йўлга қўйиш бўйича ҳамкорликни жадаллаштиришга келишиб олдилар. Тегишли лойиҳалар бўйича «йўл харитаси» тасдиқланган.
