freepik.com сайти фотосурати
Атом саноатини ривожлантириш бўйича давлат комиссияси Қозоғистонда атом электр станциясини қуриш учун иккинчи истиқболли майдонни аниқлади. Атом энергияси агентлиги раҳбари Алмасадам Сатқалиев парламентнинг қуйи палатаси мажлиси чоғида маълум қилишича, бу майдон Олмаота вилоятининг Жамбил туманида жойлашган, деб ёзади Vlast.kz.
Мулозимнинг таъкидлашича, иккинчи завод ҳам «мамлакат жанубида бўлади», чунки жанубий Қозоғистон энергия танқислигидан азият чекмоқда.
«Ҳозирда электр энергияси «Шимол-Жануб» транзит тизими орқали узатилмоқда. Бу (иккинчи АЭС қурилиши – таҳр.изоҳи) энергия таъминоти барқарорлиги ва ишончлилигини таъминлайди», — деб ҳисоблайди агентлик раҳбари.
Сатқалиевнинг қўшимча қилишича, ҳозирда барча иштирокчилар билан музокаралар олиб борилмоқда. Хитойнинг CNC компанияси фойдасига якуний қарор қабул қилингани йўқ, бироқ Қозоғистон уни «биринчи АЭС қурилиши доирасида билдирилган таклифлари асосида АЭС қурилиши бўйича устувор пудратчи сифатида кўради».
Эслатиб ўтамиз, «Росатом» Олмаота вилоятининг Жамбил туманидаги Улкен қишлоғида республикадаги биринчи атом электр станциясини қуришни режалаштирган. Мутахассислар аввалроқ иккинчи завод учун эҳтимолий жой сифатида Шарқий Қозоғистон вилоятининг Курчатов шаҳрини тилга олишган эди.
Шу билан бирга, президент Қосим-Жомарт Тўқаев ўтган йил баҳорида «келгуси ўн йилликлар учун ривожланиш пойдевори бўладиган янги энергетика секторини яратиш» учун республикада учта атом электр станциясини қуриш зарурлигини эълон қилганди. Бугун Алмасадам Сатқалиев ҳукумат Ғарбий Қозоғистон ва Каспий денгизи соҳилларини кичик ва ўрта реакторларли атом электр станцияси учун потенциал жой сифатида кўриб чиқаётганини маълум қилди.
