t.me/customs_rf фотосурати
Қозоғистон Евроосиё Иқтисодий Комиссиясига (ЕИК) Россия чегарасидаги тирбандлик ва Россиянинг янги иммиграция қонунчилиги бўйича ҳайдовчиларнинг шикоятлари юзасидан мурожаат қилди. Бу ҳақда 9 октябрь куни Қозоғистон ҳукумати матбуот хизмати хабар берди.
Остона мавжуд вазиятни «ташқи савдога тўсқинлик қилувчи тўсиқ» сифатида тан олинишига умид қилмоқда. Бу масала 13 октябрь куни ЕИКда ва 7 ноябрь куни Қозоғистон ва Россия ўртасидаги ҳамкорлик бўйича ҳукуматлараро комиссиянинг 26-йиғилишида кўриб чиқилади, дейилади пресс-релизда, унинг асосий қисми Россия Федерациясига киришнинг янги қоидалари ва оғир юк машиналари ҳайдовчиларининг шикоятларига бағишланган.
Гап чет эл фуқароларига Россия Федерациясида рўйхатдан ўтмасдан, кириш ва чиқишлар сонидан қатъи назар, календарь йилида 90 кундан ортиқ бўлмаган муддатга қолишга рухсат берувчи қонун ҳақида бормоқда. Илгари бу муддат йилига 180 кун бўлган. Ушбу чекловлар халқаро юк ва йўловчи ташиш билан шуғулланувчи ҳайдовчиларга ҳам тегишли. Бундан ташқари, Россия ва Белоруссияда туриб қолишлар бирга ҳисобланади, чунки бу давлатлар Иттифоқ давлатини ташкил қилади.
Ушбу қоида визасиз бўлган кўпгина мамлакатларга, жумладан Қозоғистон, Арманистон, Озарбайжон, Қирғизистон, Ўзбекистон ва бошқаларга нисбатан қўлланилади. Қозоғистонда шунга ўхшаш хорижий фуқароларнинг рўйхатдан ўтмасдан қолишлари учун олти ойлик муддат ичида 90 кун бўлиш талаблари халқаро юк ва автобус қатнови билан шуғулланувчи ҳайдовчиларга нисбатан қўлланилмайди, бу халқаро амалиётга мос келади, дея таъкидлайди ҳукумат.
Мажилис (парламент қуйи палатаси) депутати Болатбек Нажметдинулининг қайд этишича, янги қоидалар нафақат халқаро ташувчиларга, балки ЕОИИ мамлакатларида ишловчи ҳайдовчиларга ҳам тегишли. Уларнинг аксариятида Россия Федерациясида қолиш лимити тугаган ва улар рейсларни давом эттириш учун янги йил бошини кутишга мажбур. Белгиланган 90 кунлик лимитдан ошиб кетганлар қўлга олинган ва мамлакатни тарк этишлари тўғрисида огоҳлантирилган.
Фақат пресс-релиз охиридагина чегарадаги вазият Россия томонидан сентябрь ойидан бери «яширин импорт»ни аниқлаш бўйича ўтказилаётган рейдлар бошлангани туфайли кескинлашгани айтилган. «Қўшимча текширувлар ўтказилиши муносабати билан айрим назорат-ўтказиш пунктларида юк автомашиналарини кўрикдан ўтказиш вақти кўпайди», — дейилади матбуот хизмати хабарида.
Россия-Қозоғистон чегарасида юк машиналари тирбандлиги билан боғлиқ вазият сентябрь ойидан бери оғирлигича қолмоқда. Расман икки давлат расмийлари оғир юк ташувчи юк машиналари чегарадан ўтишда ҳеч қандай муаммога дуч келмаётганини даъво қилмоқда. Бироқ, Қозоғистон ОАВлари Россия томони текширувларни кучайтиришидан қўрқиб, Қозоғистонда айрим юк машиналари туриб қолаётганини ёзмоқда. Октябрь ойи бошида РФ Федерал божхона хизмати чегара яқинида «транспорт воситаларини танлаган ҳолда кўрикдан ўтказувчи» «мобил гуруҳлар» фаолият юритаётгани ҳақида маълум қилди.
«Ушбу чора-тадбирлар импортнинг «яширин» схемаларига қарши курашишга қаратилган. Аксарият ҳолларда истеъмол товарлари сифатсиз бўлиб, улардан фойдаланиш истеъмолчилар ҳаёти ва соғлиғига бевосита таҳдид солиши мумкин», — дейилади божхона хизмати хабарида.
