Аблайхан Саринжепов. Татьяна Файль фотосурати, tobolinfo.kz
Қўстанайда (Қозоғистоннинг шимоли-ғарбий қисмидаги шаҳар) маҳаллий фуқаро Аблайхан Саринжепов уролог-жарроҳ Антон Кистановга ҳужум қилганликда айбланиб, ҳукм қилинди. Унга олти ойлик қамоқ жазоси тайинланди, бироқ тергов ҳибсхонасида ўтган вақт ҳисобга олинса, унинг жазони ўташга икки ҳафтадан камроқ вақти қолди, деб ёзади Tobol.info.
Иш Қўстанай шаҳар №2 судида кўриб чиқилди. Саринжеповга нисбатан Қозоғистон Республикаси Жиноят кодексининг 114-моддаси 3-қисми («Эҳтиётсизлик оқибатида баданга оғир шикаст етказиш») бўйича айблов қўйилди. У жазони энг кам тартибли колонияда ўтайди. Шунингдек, у жабрланувчилар товон жамғармасига 39 минг тенге (72 доллар) ва жабрланувчи Антон Кистановга қўшимча 2,5 миллион тенге (4,6 минг доллар) тўлаши керак. Унинг фуқаролик даъвоси тўлиқ қондирилди.
Судя Анара Шаймурунова судланувчига нима учун айнан шундай жазо тайинланганини тушунтирди. Унинг сўзларига кўра, Саринжепов шифокорнинг лабига урган, бу ўз-ўзидан танага жиддий зарар етказмайди. Кистанов тик турган жойдан йиқилиб, бошини полга уриб, оғир тан жароҳати олган. Шу боис суд Саринжеповнинг шифокорга оғир тан жароҳати етказиш ниятида бўлмаганини аниқлаган. Унинг уч нафар ёш фарзанди борлиги сабабли ҳам жазосининг енгиллаштирилшига сабаб бўлган.
Шу билан бирга, Анара Шаймурунованинг қайд этишича, Саринжепов айбига иқрор бўлишига қарамай, ҳеч қандай пушаймон бўлмаган. «У содир бўлган воқеада шифокорни айблаб, жабрланувчининг ўзи у билан содир бўлган воқеага лойиқ эканини айтган. Кистанов эса ўзини тўғри тутган ва бемор ғазабини қўзғатмаган. Ишда оғирлаштирувчи ҳолатлар аниқланмади», — дея хулоса қилди судя.
Республикада кенг муҳокамаларга сабаб бўлган шифокорга ҳужум 17 июль куни Қўстанай вилоят шифохонасининг тез тиббий ёрдам бўлимида содир бўлган. Хабар қилинишича, Антон Кистанов операциядан сўнг беморларни кўриш учун тез ёрдам бўлимига тушган. Навбатда турган Аблайхон Саринжепов унинг юзига мушт туширган, натижада шифокор ҳушидан кетиб, комага тушиб қолган. Унга бош мия жароҳати, қон кетиши ва бош чаноғининг орт суяги синиши ташхиси қўйилган. Кистанов узоқ вақт давомида Остонада даволанаётган, у ерга тез тиббий ёрдам машинасида олиб кетилган. Ҳужумчи июль ойида ҳибсга олинган ва у тергов изоляторида суд жараёнини кутган.
Мазкур воқеадан сўнг Қозоғистон президенти Қосим-Жомарт Тўқаев тиббиёт ходимларига ҳужумлар учун жазо чораларини кучайтиришни буюрди. Бироқ, тегишли қонунчиликка ўзгартиришлар ҳали қабул қилинмади.
