Видеодан скриншот
Қозоғистоннинг ғарбий қисмида жойлашган Жанаўзен шаҳридаги «МунайСпецСнаб Компани» МЧЖ хизмат кўрсатиш компанияси ходимлари иш ташлашди, деб хабар беради Inbusiness.kz нашри. Акция иштирокчилари «меҳнат ҳуқуқларининг бузилаётгани ва ижтимоий адолатсизликдан хавотир билдираётгани»га оид видеомурожаатини тарқатишди.
«Талабларимиз бажарилмагани сабабли, 2025 йил 28 октябь кечасидан фаолиятимизни тўхтатдик», — дейди иш ташловчилардан бири.
Ишчилар айнан қайси талаблари қониқтирилмаганига аниқлик киритишмаган. Улар ўз мурожаатларини Қозоғистон, минтақа раҳбарияти ва «КазМунайГаз» миллий компаниясига йўллашган. Ҳозирча бу масала бўйича расмий изоҳлар берилмаган.
«МунайСпецСнаб Компани» МЧЖ нефть компанияларига юк ташиш хизматларини кўрсатади.
Шунга ўхшаш акциялар иқтисодиёти нефть ва газ саноатига асосланган Қозоғистоннинг ғарбий ҳудудларида кенг тарқалган. 2023 йил охири ва 2024 йил бошида Манғизтовни нефть корхоналари ишчиларининг норозик акциялари қамраб олганди. Хусусан, West Oil Software ходимлари бир неча ой давомида «КазМунайГаз»га қўшилишни, ягона иш ҳақи тизимига бўйсунишни ва ускуналари ва иншоотларини янгилашни талаб қилиб, иш ташлашганди.
2024 йил январь ойи ўрталарида «Буюк девор» бурғулаш компанияси (Актау) ишчилари президент Қосим-Жомарт Тўқаевга компанияни кенг қамровли аудит қилишни талаб қилиб мурожаат қилишганди ва шунингдек, иш ўринлари қисқартирилишига қарши норозилик билдиришганди.
Ўша ойнинг охирида Жанаўзенда «Кезби» МЧЖ компаниясининг тахминан 800 ходими иш ҳақининг 50 фоизга оширилишини, ускуналарни янгилашни ва компаниядаги оғир вазият учун масъул бўлган бир нечта шахсларни ишдан бўшатишни талаб қилиб иш ташлаганди.
Шу йил баҳорда Тенгиз конида ишлаётган «Кәсіби таңдау» компанияси ишчилари иш ташлаганди.
