Acwa Power компанияси матбуот хизмати фотосурати
Япония компаниялари ва банклари Ўзбекистоннинг энг йирик яшил энергия лойиҳасида иштирок этади. Халқаро консорциум мамлакатда умумий қиймати 1,45 миллиард доллар бўлган қуёш электр станциялари ва энергия сақлаш тизимларини қуради, деб хабар беради «Газета.uz» Nikkei нашрига таянган ҳолда.
Кун чиқар мамлакати журналистларининг хабар беришича, консорциум таркибига учта япон компанияси ва Саудия Арабистонининг Acwa Power корпорацияси киради. Компаниядаги улушлар қуйидагича тақсимланган: 51% га саудияликлар, 20,2% га — Sumitomo, Yonden ва Chubu ҳар бири 14,4% эгалик қилади .
Лойиҳа бир нечта кредит ташкилотлари, жумладан, Япония халқаро ҳамкорлик банки (JBIC), Осиё тараққиёт банки, Европа тикланиш ва тараққиёт банки, Ислом тараққиёт банки ва бир нечта хусусий банклар томонидан молиялаштирилади. JBIC 635 миллион долларлик кредит тақдим этувчи энг йирик молиялаштирувчи бўлади.
Лойиҳа умумий қуввати 1000 МВт бўлган қуёш электр станцияларини қуриш ва улардан фойдаланишни кўзда тутади, бу тахминан 600 000 хонадоннинг йиллик электр энергияси истеъмолига тенг. Бундан ташқари, Ўзбекистоннинг Самарқанд ва Бухоро вилоятларида умумий қуввати 1336 МВт/соат бўлган энергия сақлаш тизимлари қурилади.
Қайд этилишича, ушбу лойиҳа мамлакат тарихидаги қуёш генерацияси ва энергия тўплаш бўйича энг йирик қўшма ташаббус бўлади. ACWA Power Sazagan Solar 1 биринчи лойиҳаси қурилиши 2027 йилда, Sazagan Solar 2 эса 2028 йилда якунланиши кутилмоқда.
Шундан сўнг ишлаб чиқарилган барча электр энергияси 25 йиллик электр энергияси олди-сотди шартномаси доирасида «Ўзбекистон миллий электр тармоқлари» компаниясига сотилади.
Халқаро консорциум томонидан амалга оширилаётган ташаббус Марказий Осиё мамлакати учун муҳим, чунки республика ҳукумати 2030 йилга келиб қайта тикланадиган энергия манбалари улушини умумий электр энергияси қувватининг 54 фоизигача етказишни мақсад қилган. Шунинг учун республика ҳукумати қуёш электр станциялари қурилишини фаол қўллаб-қувватламоқда. Шунингдек, энергияни сақлаш тизимлари ортиқча энергияни сақлаш ва талаб ҳамда таклифни мувозанатлаштиришни таъминлайдиган энергия тармоғини барқарорлаштиришнинг асосий элементига айланиши кераклиги таъкидланади.
