Тангригули Атаев. turkmen.news сайти фотосурати
«Туркманхимия» давлат концерни раиси вазифасини бажарувчи Тангригули Атаев 2022 йили машинада бир кишини уриб юборган ва у инсон ўлган. Аммо Атаев 10 000 доллар пора эвазига жазодан қутулиб қолган, деб хабар беради Turkmen.news нашри.
Фожиа 2022 йил ёзида Ашхободда содир бўлган. Ўша пайтда «Туркманхимия» ташқи иқтисодий алоқалар департаментида катта мутахассис бўлиб ишлаган Атаев кундузи машинасини юқори тезликда бошқариб, пиёдалар ўтиш жойида бир кишини уриб юборган. Эркак воқеа жойида вафот этган, унинг хотини ва болалари қаровсиз қолган.
Ҳайдовчининг етти йилгача қамалиши, кейинчалик унинг уч йилгача маълум фаолият билан шуғулланиши тақиқланиши мумкин бўлган. Бироқ, Ашхобод полицияси терговчиси 10 000 доллар пора эвазига транспорт воситаси экспертизасини сохталаштирган, натижада мумкин бўлмаган жойда йўлни кесиб ўтган пиёда айбдор бўлиб чиққан. Жабрланувчининг оиласи ҳам ишни давом эттиришдан бош тортгани эвазига катта миқдорда пул олган.
Хабар қилинишича, «Туркманхимия»да ишлайдиган асосий коррупциянерлардан бири Мурод Чариев Атаевга пулни етказиб берган. Ўша пайтда у Ташқи иқтисодий алоқалар департаментини бошқарган ва Атаевнинг бевосита раҳбари бўлган. Кейинчалик кадрлар ўзгаради: 2023 йили Бош прокуратура томонидан ўтказилган тергов давомида Чариев лавозимидан туширилади ва ишдан бўшатилади. Атаев жиддий камчиликлари учун ишдан бўшатилган Доврангелди Сапбаевнинг ўрнини эгаллаб, уч ойдан бери мамлакат кимё саноати вазири лавозимини эгаллаб келмоқда.
«Туркманхимия» давлат концерни мамлакатнинг асосий даромад манбаларидан бири ҳисобланади. Шу билан бирга, оммавий ахборот воситаларида мунтазам равишда бу ташкилотдаги коррупция ва қариндош-уруғчиликга оид жанжаллар ҳақида хабарлар пайдо бўлади. Масалан, 2021 йили turkmen.news ва унинг ҳамкорлари томонидан ўтказилган текширувлар Туркманистон карбамид экспортидан асосий фойда олувчи шахс президент Сердар Бердимуҳамедовнинг амакиваччаси Ҳожимурат Режепов эканини аниқлаган. Унинг «Ак Хазына» ва Caran Holdings компаниялари Давлат товар- хомашё биржасидаги ким ошди савдоларида расман иштирок этган, аммо бутун карбамид ҳажмини бошланғич нархда — бозор қийматидан анча паст нархда сотиб олган ва чет элга экспорт қилган.
