Шавкат Мирзиёев Тошкент давлат тиббиёт университетида. Ўзбекистон президенти матбуот хизмати фотосурати
Ўзбекистон президенти Шавкат Мирзиёев соғлиқни сақлаш соҳасида рақамлаштиришни жадаллаштиришни буюрди, бу беморлар учун қулайлик, шифокорлар учун самарадорлик ва давлат учун ресурсларни тежашни таъминлайди. Давлат раҳбари бу ҳақда 10 ноябрь куни Тошкент давлат тиббиёт университетида бўлиб ўтган тегишли ташаббуслар тақдимотида маълум қилди, деб хабар беради унинг матбуот хизмати.
Расмийларнинг сўзларига кўра, сўнгги йилларда соғлиқни сақлашни ривожлантириш учун 230 триллион сўм (19 миллиард доллардан ортиқ) ажратилган. Ушбу маблағлар ҳудудларда 187 та янги клиника ва касалхоналарни фойдаланишга топширишга сарфланди, 1244 та муассаса реконструкция қилинди ва замонавий ускуналар билан жиҳозланди.
Натижада бирламчи тиббиёт муассасалари қуввати 60 фоизга ошиб, тиббий хизмат аҳолига анча яқинлашди. Илгари асосан пойтахтда бажарилган юқори технологик ва диагностика-даволаш усулларининг 400 дан ортиғи ҳудудларда амалга оширилмоқда.
Юзлаб мураккаб амалиётлар вилоят марказларига, кам инвазив операциялар туман даражасига туширилди. Биринчи марта 45 та туманда буйрак кўчириб ўтказиш амалиёти йўлга қўйилди.
Сўнгги йилларда юртимиз тиббиётида илғор технологиялар жорий этилиб, таълим жараёнларига ҳам кенг татбиқ қилинмоқда. Хусусан, учта олий таълим муассасаси негизида Тошкент давлат тиббиёт университети ташкил этилди. Урганч давлат тиббиёт институти фаолияти йўлга қўйилди. Саккизта тиббиёт олий таълим муассасаси халқаро аккредитациядан ўтди. Бу соҳада замонавий билим ва кўникмаларга эга кадрлар тайёрлаш имкониятлари янада кенгайди.
Тошкент давлат тиббиёт университетида инфратузилма яхшиланиши натижасида таълим олувчилар сони 29 минг 864 нафарга етди. Ўқув жараёнлари энг замонавий талаблар даражасига кўтарилди, рақамлаштириш фаол давом этмоқда.
Йиғилишда соғлиқни сақлаш соҳасида янги технологиялардан фойдаланишга алоҳида эътибор қаратилди. Мамлакат бўйлаб муассасалар инновацион ечимлар билан жиҳозлангани ва ягона инфратузилма яратилгани таъкидланди. 2024-2025 йиллари 3000 дан ортиқ тиббиёт ташкилотлари маҳаллий тармоқларга уланди ва уларнинг техник инфратузилмаси янгиланди.
Президентга DMED ягона электрон ахборот тизими имкониятлари ҳам тақдим этилди. Бу тизим орқали 36 миллион нафардан зиёд фуқароларнинг тиббий маълумотлари ягона базада жамланди. Тез тиббий ёрдам хизматида электрон бошқарув йўлга қўйилиб, чақириқларга етиб бориш вақти 25-30 дақиқадан 10-15 дақиқагача қисқартирилди. Яқин келажакда Online-шифокор хизмати жорий этилиб, аҳолига масофадан тиббий маслаҳат бериш имкони яратилади.
Шунингдек, «Электрон рецепт» тизими фаолияти йўлга қўйилиши натижасида ортиқча дори ёзиш ҳолатлари 40 фоизга камайди, дори воситалари айланмаси шаффофлашди. Барча тиббий маълумотлар биометрик ҳимоя остида сақланиб, шахсий маълумотлар хавфсизлиги таъминланмоқда.
«Замонавий тиббиёт муассасаларини барпо этяпмиз, соҳада сунъий интеллектни жорий қиляпмиз, энг илғор ускуналарни олиб келяпмиз. Бу ўзгаришлар энг қуйи бўғингача етиб бориши зарур. Энг муҳими, ҳар бир тиббиёт ходимининг малакасини ошириш, замонавий билим ва кўникмалар билан таъминлашга эътибор қаратишимиз лозим. Шундагина ҳаракатларимиз натижа беради», — деди Мирзиёев.
