АҚШ Тошкентда жойлашган Datavice MCHJ компаниясини Россияга қарши санкциялар қўлланиладиган субъектлар рўйхатига қўшди. Бу ҳақда 19 ноябрь куни АҚШ Молия вазирлигининг Хорижий активларни назорат қилиш бошқармаси (OFAC) томонидан эълон қилинган расмий ҳужжатда хабар берилган.
OFAC Datavice MCHJни махсус белгиланган фуқаролар ва блокланган шахслар (SDN List) рўйхатига қўшди. Бу шуни англатадики, компаниянинг АҚШ юрисдикциясидаги барча активлари блокланиши мумкин ва АҚШ компаниялари ва фуқароларига у билан ҳар қандай молиявий операциялар амалга ошириш тақиқланади.
Бундан ташқари, Datavice иккиламчи санкциялар хавфи остида қолган, яъни компания билан бизнес юритадиган ҳар қандай учинчи томон ҳам чекловларга дучор бўлиши мумкин.
Расмий ҳужжатда Datavice компанияси CAATSA – Russia ва CYBER4 тоифалари бўйича таснифланади, бу эса унинг Россия инфратузилмасини қўллаб-қувватлашини ёки кибержиноятчилик билан боғлиқ фаолиятда иштирок этишини кўрсатади
OFAC Datavice MCHJни илгари АҚШ санкциялари рўйхатига киритилган Россиянинг Aeza Group LLC компанияси билан алоқаларини аниқ кўрсатган. Aeza Group LLC турли кибержиноятчи гуруҳларга, жумладан, талончи-операторлар ва зарарли дастурлар яратувчиларига «ўқ ўтказмайдиган» хостинг хизматларини тақдим этишда айбланади. Aeza Group мижозлари орасида BianLian талончи-дастурлари билан боғлиқ гуруҳлар, шунингдек, тармоқларда ноқонуний фаолият юритадиган RedLine ва BlackSprut платформалари бор. АҚШ регуляторларининг маълумотларига кўра, ушбу субъектлар хостинг хизматларидан АҚШ мудофаа ва технология компанияларига, шунингдек, бутун дунё бўйлаб объектларга ҳужум қилиш учун фойдаланган.
ℹ️ Аввалроқ, 2024 йили иккита ўзбек компанияси — Uzstanex ва The Elite Investment Group OFAC санкциялар рўйхатига қўшилган эди. 2023 йили «Оҳангаронцемент» заводи ўзбек миллатига мансуб россиялик бизнесмен Алишер Усмонов билан алоқадорлиги сабабли рўйхатга киритилганди. АҚШ Молия вазирлиги заводнинг назорат улуши Akkermann Cement CA га тегишли эканини таъкидлайди, унинг асосчиси эса Усмоновнинг USM холдинг компанияларидан бири ҳисобланади.
АҚШ санкциялар рўйхатига биринчи бўлиб 2022 йили июнь ойида ўзбек хусусий компанияси PROMCOMPLEKTLOGISTIC киритилган эди. АҚШ Давлат департаменти маълумотларига кўра, ушбу компания 2022 йил март ойида Россиянинг «Радиоавтоматика» компаниясига қарши санкциялар жорий этилганига қарамай, у билан ҳамкорлик қилишда давом этган.
