Қодирбек Атамбаев. Видеодан кадр
Собиқ президент Алмазбек Атамбаевнинг ўғли ва бир нечта тарафдорлари Қирғизистонда 30 ноябрга белгиланган Жогорку Кенгашига (парламент) бўлиб ўтадиган парламент сайловларидан сўнг оммавий тартибсизликларга тайёргарлик кўриш билан боғлиқ иш бўйича ҳибсга олинди. Бу ҳақда Kaktus.media хабар берди.
Ишга Социал-демократлар партияси етакчиси Темирлан Султанбеков, унинг ўринбосари Қодирбек Атамбаев (собиқ президентнинг ўғли), собиқ депутат Шайлубек Атазов, Социал-демократлар партияси аъзоси Эрмек Эрматов, Алмазбек Атамбаевнинг собиқ қўриқчиси Дамир Мусакеев, собиқ депутат Кубаничбек Қодиров ва бизнесмен Урмат Барктабасов (Аскарбеков) жалб қилинган. Ички ишлар вазирлиги (ИИВ) матбуот баёнотида расман ошкор қилинмаган яна уч кишининг бош ҳарфлари келтирилган.
Хабарларга кўра, Ички ишлар вазирлиги сиёсатчилар, собиқ парламент аъзолари, собиқ давлат хизматчилари ва хавфсизлик кучлари ходимларидан иборат бузғунчи гуруҳ фаолиятини фош қилган. Улар потенциал провокациялар ва зўравонлик тўқнашувларида иштирок этиш учун тарафдорларни, жумладан, уюшган жиноятчилик гуруҳлари ва спорт жамоалари вакилларини жалб қилишган.
«Ҳибсга олинганлар сайлов натижалари эълон қилингандан сўнг, оммавий норозилик кўринишини яратиш учун жанубдан бошлаб Бишкек ва вилоятларларда давомли бир қатор митингларни режалаштиришган. Уларнинг режалари конституцияга зид чақириқлар, шунингдек, маъмурий бинолар, телеканаллар, хавфсизлик кучлари бинолари, қурол-яроғ ва жазони ижро этиш муассасаларини босиб олишни ўз ичига олган», — деб таъкидлади Ички ишлар вазирлиги.
Хавфсизлик кучларининг маълумотларига кўра, фитначилар аниқ иерархияни ўрнатган ва ролларни тақсимлаган: мувофиқлаштириш гуруҳлари деб аталадиган гуруҳлар сиёсий талабларни қўйишлари, криминал тузилмалар эса норозилик намойишларини куч билан қўллаб-қувватлашлари керак бўлган. Алоҳида иштирокчилар «келажакдаги лавозимларни олдиндан ўзаро тақсимлаб олишган».
Тинтувлар чоғида ҳибсга олинганлардан қурол-яроғ, ўқ-дорилар, гранаталар, алоқа ускуналари, норозилик фаолияти ва ҳаракатлар режаларини молиялаштиришга оид ҳужжатлар, шунингдек, гиёҳванд моддалар ва 150 000 доллар нақд пул мусодара қилинган.
Ҳибсга олинганларга Қирғизистон Жиноят кодексининг 278-моддаси 1-қисми («Зўравонлик, қирғин, ўт қўйиш, мулкни йўқ қилиш, ўқотар қурол, портловчи моддалар ёки портловчи қурилмалардан фойдаланиш ёки ҳукумат амалдорига қуролли қаршилик кўрсатиш орқали оммавий тартибсизликларни ташкил этиш») бўйича айблов қўйилган. Улар вақтинчалик сақлаш ҳибсхонасига жойлаштирилган.
23 ноябрь куни Бишкекнинг Первомайский туман судининг қарори билан Атамбаев, Султанбеков, Эрматов ва Бариктабасов 2026 йил 17 январгача ҳибсда сақланади.
Собиқ президентнинг ўғли тергов ҳибсхонасидан иккита хатни эълон қилган, унда у хавфсизлик кучларининг босими, адвокат билан учрашишга тўсқинлик қилиш айбловларини илгари сурган ва унга қўйилган айбловларни асоссиз деб атаган. Унинг таъкидлашича, айбловлар «оммавий тартибсизликларга чақириқлар»дан «ҳукуматни зўрлик билан ағдаришга уриниш»га ўзгартирилган. Атамбаевнинг таъкидлашича, у ва унинг ҳамкасблари оммавий тартибсизликларга чақирмаган. У мухолифат номзодини қўллаб-қувватлаш учун сайловолди ташвиқоти олиб борганини даъво қилади ва жиноий жавобгарликка тортилишини Бош прокуратурага майнинг-фермаси фаолиятига оид илгари ёзган шикояти, нархлар ошиши ҳамда ижтимоий-иқтисодий вазият ҳақидаги ижтимоий тармоқлардаги постлари билан боғлайди.
22 ноябрь кунги ҳибсга олишлар ва тинтувлар бир қатор бошқа мухолифат сиёсатчилари, уларнинг оила аъзолари ва оммавий ахборот воситалари вакилларига ҳам таъсир кўрсатди. Хусусан, «Апрель» телеканалининг собиқ бош директори Дмитрий Ложников, шунингдек, хавфсизлик кучлари томонидан жиҳозлари ва шахсий буюмлари мусодара қилинган мухолифат етакчиси Адахан Мадумаровнинг жамоаси тинтув ҳақида хабар беришди. Собиқ биринчи хоним Раиса Атамбаева ўроқ қилинган ва унинг квартираси ҳам тинтув қилинган. Сўроқлардан сўнг бу шахслар қўйиб юборилган.
