Иккинчи Ғарбий округ ҳарбий суди 33 ёшли Ўзбекистон фуқаросини терроризмни молиялаштиришда айблаб 15 йилга озодликдан маҳрум қилди. Бу ҳақда Москва шаҳар прокуратураси матбуот хизмати хабар берди.
Суд 2022 йил октябрь ойида Москвада бўлган Махбубахон Ўринбоева танишига ўз номига очилган банк картаси ва ҳисоб рақами реквизитларини, шунингдек, ҳисоб рақами устидан тўлиқ назорат қилиш ҳуқуқини берган ҳолда фойдаланувчи шахсий кабинети маълумотлари, паролини берганини аниқлаган.
Ўринбоеванинг ҳисоб рақами ва картасидан фойдаланиб, эркак 6500 рублни қабул қилиб олган ва кейин уни бошқа бировга ўтказган. Бу пуллар чет элда ечиб олинган. Маблағлар террорчи ташкилот фаолиятини молиялаштириш учун мўлжалланган бўлган. Москва прокуратураси ташкилот номини ошкор қилмаган. ТАСС хабарига кўра, гап Сурияда жанг қилаётган «Катиба Тавҳид вал-Жиҳод» (РФда тақиқланган ва террорчи деб топилган) халқаро террорчи ташкилоти ҳақида кетмоқда.
Ўринбоева айбини тан олмаган. У Россия Жиноят кодексининг 33-моддаси 5-қисми ва 205.1-моддаси 4-қисми («Терроризмни молиялаштиришни ташкил этишга кўмаклашиш») бўйича ҳукм қилинган. Ҳукм ҳали қонуний кучга кирмаган ва белгиланган тартибда шикоят қилиниши мумкин.
