Нани. sports.ru сайти фотосурати
Қозоғистоннинг «Актобе» футбол клуби собиқ футбол юлдузлари — португалиялик Нани, босниялик Миралем Пьянич ва россиялик Федор Смолов билан шартнома имзолаши мумкин. Бу ҳақда инсайдер Иван Карпов хабар берди.
Zidan4eg Телеграм каналига кўра, 39 ёшли Нани ва 35 ёшли Пьянич Қозоғистонда ўйнаш учун футболдаги фаолиятини давом эттиришга тайёр. Футболчилар маҳаллий лига тарихидаги энг юқори маошни олишади. Шартномалар бир йилга мўлжалланган.
Шунингдек, «Актобе» немис Томас Мюллер ва украиналик Андрий Ярмоленко билан шартнома имзолашга қизиқиш билдиргани хабар қилинган. Бироқ, Мюллер сунъий майдонда ўйнашни истамагани учун кўчиб ўтишдан бош тортди ва Ярмоленко мавсум охирида карьерасини тугатишга қарор қилди.
«Актобе» илгари тажрибали 33 ёшли ҳимоячи Иван Ордец ва 36 ёшли Қозоғистон терма жамоасининг собиқ ҳимоячиси Тимур Досмагамбетов билан шартнома имзолаган эди.
Таъкидлаш жоиз, «Актобе» футбол клуби яқинда бизнесмен Нурлан Артиқбаев бошчилигидаги Qazaq Stroy Properties қурилиш компанияси томонидан хусусийлаштирилди.
Нани (Луиш Карлуш Алмейда да Кунья) — Португалия миллий футбол терма жамоасининг собиқ етакчи ўйинчиси бўлган. У Европа чемпионлигини қўлга киритган. У саккиз йил давомида «Манчестер Юнайтед» билан клуб даражасида муваффақиятга эришган. Шунингдек, у Португалиянинг «Спортинг», Италиянинг «Лацио» ва Испаниянинг «Валенсия» жамоаларида ҳам ўйнаган. Сўнгги мавсумларда у унчалик кучли бўлмаган жамоаларда, жумладан, Туркия, АҚШ ва Австралия лигаларида ўйнаган. Нанининг сўнгги клуби Португалиянинг «Эшторил» клуби бўлди. 2024 йил декабрь ойида у профессионал футболдан кетишини эълон қилди. 2025 йили у Россия Медиалигасида ўйин ўтказди
Миралем Пьянич — Босния тарихдаги энг машҳур футболчилардан бири. Клуб даражасида у Франциянинг «Лион», Италиянинг «Рома» ва «Ювентус» ҳамда Испаниянинг «Барселона» клубларида ўйнаган. Пьяничнинг сўнгги клуби Москванинг ЦСКА клуби бўлди. 2025 йил декабрь ойида у карьерасини тамомлашини маълум қилди.
