Виктор Мозес.Тасвир AmanVibe Telegram-каналидан олинди
Нигериялик Виктор Мозес Қизилўрда клуби «Қайсар» билан шартнома имзолайди. Бу ҳақда журналист ва Қозоғистон футзал ассоциацияси раҳбари Нурсултон Қурман маълум қилди, деб хабар беради «Тотальный Футбол».
35 ёшли Нигерия терма жамоасининг собиқ футболчиси, «Челси» ва Москванинг «Спартак» ўйинчиси Виктор Мозеснинг «Қайсар»га келиши ҳақидаги маълумот биринчи марта Қозоғистон блогосферасида пайдо бўлди. Шу билан бирга, «Актобе» клуби ўз сафини юқори мартабали фахрийлар билан мустаҳкамлаши ҳақидаги гаплар фонида кўпчилик машҳур футболчилар бирин-кетин Марказий Осиё мамлакатига кўчиб ўтишдан бош тортдилар. Шунинг учун Мозес ҳақидаги миш-мишлар кўпинча блогерларнинг «хайпи» сифатида қабул қилинди.
Кейинчалик клуб ўз ижтимоий тармоқларида юзи беркитилган ва нигерияликга ўхшаш қиёфадаги футболчи фотосуратини жойлаштирди. Хабарда яқин орада жамоанинг янги ўйинчиси маълум қилиниши айтилган, бироқ унинг кимлиги ошкор қилинмаганди. Курман эса вазиятга ойдинлик киритди.
«Биз бу ҳақда анчадан бери билардик, лекин буни эълон қилмасликни сўрадик. Биз буни кейинроқ маълум қилишни режалаштиргандик, аммо кеча ниҳоят маълумот пайдо бўлди, демак бу ҳақиқат. Гап Виктор Мозес ва унинг «Қайсар»га ўтиши ҳақида кетяпти. Ўтган йили у «Лутон Таун»да ўйнаган. Яқингача у жамоасиз эди ва кейин, миш-мишларга кўра, унга турли клублар, жумладан, араб клублари қизиқиш билдиришган, аммо натижада айнан «Қайсар» у билан келиша олган», — деб тушунтиради Қурман.
Мозес 24 январь куни Қизилўрдага келиши ва ўша куни шартнома имзолаши кутилмоқда.
Шуни таъкидлаш лозим, «Қайсар» футбол клуби яқинда хусусийлаштирилган. Клуб учун катта сармоя режалаштирилган — 12 миллиард тенге (23,8 миллион доллар) ҳақида сўз борган.
Виктор Мозес — Англия футболида тарбия топган нигериялик футболчи. У асосан «Челси»даги фаолияти билан танилган, у билан клуб Премьер-лига ва Европа лигасида ғолиб чиққан. У Англиянинг «Уиган», «Ливерпуль», «Сток», Миланнинг «Интер», Москванинг «Спартак» ва Туркиянинг «Фенербаҳче» клубларида ўйнаган. Мозеснинг сўнгги клуби Англиянинг «Лутон»и бўлган. Ўшандан бери у эркин агент ҳисобланарди. Мозес Нигерия терма жамоаси сафида 38 та ўйинда майдонга тушиб, 12 та гол урган ва 2013 йилги Африка миллатлар кубогида ғолиб чиққан.
