Nur.kz сайти иллюстратив фотосурати
Қозоғистон Ички ишлар вазирлиги парламент депутатларининг ёлланма аскарликка оид жазоларни юмшатиш таклифидан сўнг қонунчиликка киритилиши мумкин бўлган ўзгартиришларни ишлаб чиқишда иштирок этишга тайёр. Бу ҳақда Ички ишлар вазири ўринбосари Санжар Адилов Сенатда маълум қилди, деб хабар беради Bes.media.
«Биз Мажилис аъзолари (парламентнинг қуйи палатаси – таҳр.изоҳи) билан яқиндан ҳамкорлик қиляпмиз. Биз ушбу таклифларни кўрдик, улар асосли ва мантиққа эга. Ишончим комилки, Ички ишлар вазирлиги ҳам қонунчилик жараёнида иштирок этади», — деди Санжар Адилов оммавий ахборот воситаларига берган интервьюсида.
Унинг қўшимча қилишича, Жиноят кодексининг 170 ва 172-моддалари – «Ёлланиш» ва «Хорижий қуролли можароларда иштирок этиш» билан боғлиқ масалалар Миллий хавфсизлик қўмитаси ваколатига киради ва вазирлик улар бўйича тўғридан-тўғри изоҳ бермайди.
Мажилиснинг аввалги ялпи йиғилишида депутат Жаркинбек Амантайули хорижий можароларда иштирок этган қозоғистонликларга нисбатан жазоларни юмшатишни таклиф қилган эди. Бош вазир Олжас Бектеновга йўллаган илтимосида депутат бунинг битта шарт билан амалга оширилиши мумкинлигини таъкидлади: агар тегишли фуқаролар террорчи ташкилотлар аъзоси бўлмаса ва ўз ихтиёри билан уйга қайтишга тайёр бўлса. Шунингдек, у бундай ҳаракатларда айбланганларни ижтимоий ва психологик реабилитация қилиш бўйича давлат дастурини ишлаб чиқишни таклиф қилди.
Депутатнинг сўзларига кўра, 2025 йили 26 нафар қозоғистонлик чет элдаги ҳарбий операцияларда иштирок этгани учун судланган.
Қозоғистоннинг амалдаги Жиноят кодексидаги ёлланма аскарлик моддаси бўйича максимал жазо умрбод қамоқ жазосини назарда тутади. 172-модда бўйича энг кам жазо беш йил, 170-модда бўйича эса етти йил озодликдан маҳрум қилиш жазоси кўзда тутилган.
