Нодир асарлар. ИЦМ матбуот маркази фотосурати
Ўзбекистон Ислом цивилизацияси маркази Мавороуннаҳрнинг сўфийлик меросига оид учта нодир асарни нашрга тайёрламоқда, деб хабар беради марказ матбуот хизмати.
Гап Шайх Нажмиддин Кубронинг «Мезон ул-ақоид», Шайх Хованд Тоҳурнинг «Райҳония», Мавлоно Яъқуб Чархийнинг «Рисолаи абдолия» рисолалари ҳақида бормоқда.
Кубравия тариқатининг асосчиси Шайх Нажмиддин Кубро қаламига мансуб «Мезон ул-ақоид» асари инсоннинг ички камолоти ва ахлоқий тарбиясига бағишланган. Унда комил шахсни шакллантирувчи ўнта сифат: тавба, зуҳд, таваккул, қаноат, узлат, зикр, сабр, таважжуҳ, муроқаба ва ризо ҳақида сўз боради.
Шайх Хованд Тоҳурнинг «Райҳония рисоласи» XII–XIII асрларда Мовароуннаҳр ҳудудида шаклланган тасаввуф мактабларини ўрганиш учун муҳим манба ҳисобланади. Унда шариат ва тариқат ўртасидаги муносабат, зикр ва хирқанинг рамзий маъноси, самоъ ва каромат тушунчалари ҳамда илоҳий муҳаббат ва ишқ фалсафаси ўрганилади.
Мавлоно Яъқуб Чархий томонидан ёзилган «Рисолаи абдолия» Нақшбандия таълимотининг муҳим манбаларидан бири ҳисобланади. Асарда Баҳоуддин Нақшбанд ва унинг шогирдлари фаолияти, уларнинг маънавий мақомлари ҳамда руҳий камолот йўли ҳақида маълумотлар келтирилган.
Ислом цивилизацияси маркази катта илмий ходими Хусрав Ҳамидовнинг таъкидлашича, кўп асрлар давомида мазкур асарлар қўлёзма шаклида сақланиб келган бўлиб, уларнинг айрим нусхалари дунё кутубхоналари ва архивларида тарқоқ ҳолда мавжуд.
У бугунги кунда ёшлар онги учун турли мафкуравий таъсирлар кучайиб бораётган шароитда ушбу асарлардаги маърифатпарварлик, инсонпарварлик ва маънавий покланиш ғоялари жамият барқарорлиги ва маънавий хавфсизлигини таъминлашда муҳим аҳамият касб этишини қўшимча қилади.
«Мазкур ишлар Марказнинг музей, кутубхона, архив, илмий тадқиқот ва таълим йўналишларини бирлаштирган ягона концепцияси доирасида амалга оширилмоқда», — дейди олим.
Ислом цивилизацияси маркази нафақат тарихий меросни сақлаш, балки уни замонавий тараққиёт эҳтиёжлари билан уйғунлаштиришга қаратилган улкан халқаро илмий-маърифий платформа сифатида дунё фондларида сақланаётган қўлёзмаларни излаб топиш, уларнинг илмий танқидий матнларини тайёрлаш, таржима ва шарҳлар яратиш, академик нашрларни амалга ошириш, кенг жамоатчилик учун оммабоп талқинларни тайёрлаш билан шуғулланади. Марказ таъкидланишича, мутафаккирларнинг Ўзбекистон тарихига оид кўплаб асарлари жаҳон кутубхоналари ва архивларида сақланмоқда. Бу борадаги ишлар Ўзбекистон президентининг мамлакат ва хорижий фондларда сақланаётган нодир манбаларни таржима қилиш, тадқиқ этиш ва оммалаштириш вазифаларини белгилаб берувчи қарори доирасида амалга оширилмоқда.
ℹ️ Ислом цивилизацияси маркази Хасти-Имом мажмуаси ёнида қурилди. Иншоот қадимги меъморий обидалар шаклида бунёд этилди. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Бу ерда Қуръон зали, 460 ўринли анжуманлар зали ва музей мавжуд бўлиб, кўргазмалар Ўзбекистоннинг исломгача бўлган даврдан то ҳозирги кунгача бўлган бутун тарихини қамраб олади. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
