Ижтимоий тармоқдаги фотосурат
Америкалик рэпер Ye, кўпроқ Канье Уэст номи билан танилган, Қозоғистонда концерт беради. Концент 14 август куни Олмаотадаги Марказий стадионда бўлиб ўтади, дея хабар беради тадбир ташкилотчиларидан — First Media Group компанияси.
Дастур тафсилотлари кейинроқ эълон қилиниши кутилмоқда. Бироқ блогер Сирим Итқуловнинг ёзишича, бўлажак шоу Марказий Осиё тарихидаги энг йирик мусиқий воқеага айланиши мумкин.
Чипталар савдоси 20 июль куни соат 12:00 да Freedom Ticketon платформасида бошланади. Чипталар нархи танланган тоифага қараб 120 мингдан 350 минг тенгегача (255–744 доллар) бўлади.
Бўлажак концерт ҳақидаги маълумотни Канье Уэст билан YEEZY лойиҳалари ва мусиқий менежмент йўналишида ҳамкорлик қилувчи менежер Жозеф Карре тасдиқлади. У Instagram’да Олмаотадаги концерт анонси туширилган ҳикояни эълон қилди.
Кўпчилик бўлажак концертни Канье Уэстнинг Қозоғистондаги илк чиқиши деб атаяпти. Бироқ. 2013 йилда ҳам рэпер Олмаотага келган ва у ерда Қозоғистоннинг биринчи президенти Нурсултон Назарбоевнинг набираси Айсултон Назарбоев ҳамда Алима Боранбаева никоҳ тўйида шахсий чиқиш қилган.
ОАВ маълумотларига кўра, Royal Tulip меҳмонхонасидаги ёпиқ тадбирдаги чиқиши учун артист тахминан 3 миллион доллар олган. Шундан сўнг у бир қатор ғарб нашрларининг танқидига учраган.
Сўнгги йилларда Уэст ўзининг оммавий баёнотлари ва хатти-ҳаракатлари сабабли бир неча бор халқаро можаролар марказида бўлди. Энг катта акс-садо берган ҳолатлар унинг антисемит баёнотлари ва Адольф Гитлерни бир неча бор очиқчасига мақтагани билан боғлиқ бўлди. Шундан сўнг Adidas, Balenciaga ва Gap каби бир қатор халқаро брендлар мусиқачи билан ҳамкорликни тўхтатган. Шунингдек, айрим Европа мамлакатларида, жумладан Буюк Британия ва Польшада унинг концертларини ўтказиш режалари бекор қилинган ёки амалга ошмай қолган. Yeezy бренди орқали свастика тасвири туширилган футболкалар сотувга чиқарилгани ҳам қўшимча танқидларга сабаб бўлди.
Кўплаб можароларга қарамай, Канье Уэст дунёдаги энг талабгир артистлардан бири бўлиб қолмоқда. Ташкилотчилар маълумотларига кўра, унинг Истанбулдаги Отатурк номидаги Олимпия стадионида бўлиб ўтган сўнгги концертига тахминан 118 минг томошабин келган ва айтишларича, у стадиондаги концертлар ташрифи бўйича жаҳон рекордини ўрнатган.
